نوێنەراو ئابیا یالا (ئەمریکای لاتین)ی، کە بەشدارییشا جە کۆنفڕانسوو گەنجانە کەردەبێ پایتەختوو فەڕەنساینە، ئەرەیاوناێوەنە پەشتیوانیی وێشا پەی گەلوو کوردی ئەرەیاونا.  

نوێنەراو ئابیا یالا هجوومە سەروازییەکاو سەروو کوردستانیشا شەرمەزارێ کەردێ و واتشا: "هجوومەکاو سەروو شارەکاو دێرکوو وەرنیشتی، شەنگال و کەمپوو پەنابەراو مەخمووری بی، مایێ تووڕەیی و بێزاریی فرەو ئێمە. هجوومەکێ چێوێ تازێ نییەنێ. ئینەیچە بۆنەو ئانەیۆ وەرنیشتنە ٢٠١٢ بەدماوە بیەن بە شۆڕشێوە نموونەیی کۆمەڵایەتی، فیمینیستی و ئیکۆلۆژیکی. پێسە دەوری گەورەش جە وەڵێوەبەردەی ژیوای فرەڕەنگ و دیموکراتیکنە گێڵنا، بەرش وست، کە کریۆ جیهانێوە تەر بونیاد بنریۆ".

ئەرەیاونایەکە پێسە بەردەواما: "حەرچندە هەزاران کیلۆمەترێ مەودا ئینا بەینمانە، وەلێ پەشتیوانی و هامسۆزیی ئێمە سنوور و ڕەنگە نەتەوەییەکا ویەرنۆ. ئێمەیچ پێسە گەلوو کوردی بە هەمان تووڕەیی و قەراردارییوە وەراوەروو نادادینە و پەی وێڕاوەبەری کۆشیەیمێ. ئابیا یالاشنە ئێمە ڕووبەڕووێ هەمان ئا هێزا، کە گەرەکشانە بە زۆر و توندوتیژی ئێمە دلێنە بەرا بیمێوە. وەلێ کۆشیای ئێمە پەی وێڕاوەبەریی ئارۆیچ پێسە ٥٠٠ ساڵی وەڵێنی قەوەتا".

جەختیچشا کەردەنۆ، "پەشتیوانی وەنەو گەلوو کوردی و جمیەرەکەیش کەرا و کۆشیایشا بە ماناو پارێزنای مافوو وێڕاوەبەردەی ئازادی و وێڕاوەبەریی هەرێمیین. حەر جە ئەرەیاونایەکەینە ئامان "وەرنیشت پەی ئێمە نموونێوە قەوەتبییەی گەلی و مدرامانی سیاسیین چوارچوەو شۆڕشێوە هەقەتینینە".

ئەرەیاونایەکەیشانە جمیەرەکاو ئابیا یالای باسشا چانەیە کەردەن، کە بێمەرج پەشتیوانێ و هامسۆزێ گەلوو کوردینێ و چا ڕووەوە واتەنشا: "پێسە گەلا، گلێرگە وێمانە و ڕەسەنەکا، هیتیارا، ئا گەلا کە ڕیشەی ئەفریقییشا هەن، ژەنێ سیاوێ، ژەنێ و ئینسانە کوئیرەکێ، بندەسێ و چەوسیێوەکێ، شۆڕشگێڵنێ، ئێمە بە بێمەرج شانە بەشانەو گەلووکوردی و کۆشیایەکەیش دژوو سەرمایەداری، ستەمکاری و سیستموو کۆلۆنیالیستیوە مردێنـمێ".

جمیەرەکاو ئابیا یاڵای داواو ئازادکەردەی سەرجەم زیندانییە سیاسییە کوردا بەتایبەتی ڕابەروو گەلوو کوردی عەبدوڵڵا ئۆجالانیشا کەردێنە و واتەنشا: " ئێمە لایەنگیرێ ئاشتیێوە شکۆمەندانەینمێ، ئاشتیێوە، کە تەسلیمبییەیش  نییا چەنە، ئاشتیێوە کە بەهاکێ و ڕەگەزەکاو ژیوایما بەڕسمی مشناسۆ. سەروو ئا بنەمێوە دەنگوو وێما پەی ئازادیی سەرجەموو زیندانییە سیاسییا بەرز کەرمێوە، بەتایبەتیچ ئازادی پەی عەبدوڵڵا ئۆجالانی، وەروو ئانەیە زیندانیکەردەی ئادی بەماناو هجوومێوەن پەی سەروو داواکاری و هومێدە ڕەواکاو گەلێوە، کە گەرەکشا بە پاو کولتوور و نەریتوو وێش بە ئازادی بژیوۆ".

ئاخریچۆ واتەنشا: "ئێمە ئارۆ بە گردوو قوەیماوە پەشتیوانی وەنەو گەلوو کوردی، کۆشیای وەرنیشتی و سەرجەموو ئانیشا کە پەی پارێزنای خاک، وەڵاتی و مافەکاشا ئینێ چێروو هجوومینە و ئانێ کە ئینێ زیندانەکانە. دەنگوو پەشتیوانیما کەش و بەحرەکاش ویەرنان، تا دلێ بێدەنگیی ژوورەکاو زیندانینە زرنگیۆوە".

ئابیا یالا کە نامێ نیشتمانی و نەتەوەی و هۆزە ڕەسەنەکاو ئەمریکای لاتینینە، جمیەرەکێش چند وەڵاتێوە  پێسە مەکسیک، کۆڵۆمبیا، ئەرژەنتین، برازیل، چیللی و پیرۆینە چالاکێنێ و پەی وێڕاوەبەری و چەسپنای مافە زەوتکریایەکاشا ئینێ کۆشیاینە.