بە پاو ئەرەیاونیاو بەرنامەکاو نەورۆزوو ٢٠٢٤، نەورۆزوو ئێساڵێ سەدان یاگێنە مەبارەک کریۆ، کە ٥٧ یاگیشا ناوەندیێ با.

مەبارەکبایی نەورۆزوو ئێساڵی ١٥وو ئاداری مەنتێقەو دەپێ-و خارپێتی دەس پەنە کەرۆ، کە یاگێ پەیدابیەی یۆ جە کادرە سەرمەشقەکاو پەکەکەی مەزڵوم دۆغانین.

کۆنگرەو گلێرگەی دیموکرات (کەجەدە)ی، جمیەروو ژەنا ئازاڎ (تەژەئا)ی، پارتی دیموکراتیکوو هەرێمەکا (دەبەپە) و پارتوو یەکسانی و دیموکراسیی گەلا (دەم پارتی) ناوەندوو کولتوریی دیجلە فوراتی. کۆنگرێوە ڕۆنامەوانییشا ڕێک وست و بەرنامەکاو نەورۆزوو ٢٠٢٤یشا ئاشکرا کەردێ.

هامسەرۆکوو کەجەدەی بەدران ئۆزتورک، هامسەرۆکەی گردینەو دەبەپەی چیدەم لچگون ئوچارە، هامسەرۆکەی گردینەو دەم پارتی تولای حاتیمۆگولار و چالاکەو تەژەئای دیلان گوڤەنچ بەشدارێ کۆنگرەکەی بێنێ.

یاگێ کریای کۆنگرەکەی بە پەرچەماو نەورۆزی ڕازیێبێنێوە.

دماو ئانەیە هامسەرۆکوو کەجەدەی بەدران ئۆزتورک بەرنامەکاو نەورۆزیش وانێوە، چالاکەو تەژەئای دیلان گوڤەنچە قسێش کەردێ.

دیلانە ئاماژەش پانەیە دا کە نەورۆز پەی گەلاو میزۆپۆتامیای بە ماناو تازەبییەیۆ مێ و واتش: 'ئی تازەبییەیۆ هەمان وەختەنە بە ماناو مدرامانی مێ دژوو دەسەڵاتداریی زاڵمی. ئینەیچ ئانەیە بەروزۆ حەریاگێوەنە زوڵم و ستەم بۆ، چا مدرامانی شکۆدار هەن. نەورۆزوو ئێساڵی قۆناغێوە چانەنە خێرامایش وەنە کەرمێ کە دژوو ژەنێ و گەلا فشارێوە فرە هەن. وەختێوە چانەنە خێرامایش وەنە کەرمێ کە گۆشەگیریی سەروو بەڕێز ئۆجالانی و گردوو زینڎانییا وەڵا بییەنۆ."

هامسەرۆکەو دەبەپەی چیدەم لچگون ئوچارە بە شێوەزاروو کرمانجی کوردی قسێش کەردێ و دەسنیشانش کەرد کە نەورۆز بە ماناو کۆشیاین.

چیدەمە باسوو ئانەیش کەرد، تا پەرسەکاو کوردی بە شێوێوە جڤاکی چارەسەرێ نەکریا هیچ پەرسێوە چارەسەرە نمەبۆ و واتش: " نزیکەو ٢٥ ساڵان بەڕێز عەبدوڵا ئۆجالان ئیمراڵیینە گۆشەگیر کریان. ئی گۆشەگیرییە چە ئیسفادێوەش دان پی وەڵاتەیە؟ حیچ ئیسفادێوەش پەی ئی وەڵاتەیە نەبییەن. جگە جە جەنگی و کوشتەی ژەنا هیچ چێوێوە نەبییەن. گۆشەگیری دماییش بێ ئاشتی و ئارامییچ مێ وەرۆ. پێسەو کۆشەرا مشۆم دمایی بە گۆشەگیری بارمێ، ئازاڎیی بەڕێز ئۆجالانی مسۆگەر کەرمێ. پێسە چەنی ٨ ئادارینە واتما، نەورۆزیچنە ماچمێشۆ 'چارەسەرکەرڎەی پەرسەکاو کوردی پێوەسا بە ئازاڎیی بەڕێز ئۆجالانیوە'. وەڵاتێوە دیموکراتیک پێوەسا بە ئازاڎیی بەڕێز ئۆجەلانیوە، پەی ئی مەبەسیچە بڵندتەر کۆشیەیمێ."

هامسەرۆکەو دەم پارتی تولای هاتیمۆگوللارە بە عەرەبی مەبارەکباییش کەرد و واتش: "بەرنامەکاو نەورۆزیما ئامەدوو دڵوو کوردسانیوە، پەی گردوو گەلاو وەرکەوتوو دلێڕاسەی و جیهانی ئەرەیاونێ."

تولای هاتیمۆگولارە ئاماژەش پانەیە دا ئەوەخوایش کەرمێوە جە چارەسەریی دیموکراتیکی و واتش: "سووربییەی وێما بە کۆشیایما گەورە کەرمێ و ئەنجامما بۆ."

تولای هاتیمۆگولار سەرەنجرەش وستە سەروو مانگێرتەی جە وارڎەی زینڎانەکانە و چالاکییەکاو ئێشگێریی دادپەروەری و واتش: " مشۆم کێشەکاو کوردی بە ئاشتی و دیموکراتیکی چارەسەرێ کریا."

دماو قسەکا، بەرنامەکاو نەورۆزی بە گێڵنای ئاهەنگی دماییشا ئاما.