بە پاو هەواڵێوە تۆڕەو مافەکا مرۆڤو کورڎەسانی جە سەروبەڼو دووەم ساڵیاڎو سەرهۊرداو ژەنی، ژیۋای، ئازاڎی و جە درێژەو دەسبەسەرکەرڎەی چالاکا و بنەیانەو گیانبەخشایانە، هێزە ئەمنییەکۍ ئێرانی هرووژمشا کەرڎەن سەرو یانەو مینا سوڵتانیۍ و بێ وستەی ڕووەو ئەمرەو دادگای گێرتێنەشا.

جە ماوەو دوو ساڵی ۋییەرڎەینە ئەڎا مینا سوڵتانیە چڼین جارۍ بە مەڵامەتوو چالاکیەکاشۆ جە لایەنو ناوەندە ئەمنییەکاوە هەڕەشێش ۋنە کریێبۍ.

شەهریار محەمەدی ١٨و تشرینو دووەمو ٢٠٢٢ جە ۋێنیشاندایە جەماوەرییەکا بۆکانینە جە ئاکامو تەقەو هێزە ئەمنییەکانە پێکیا و دماو یاونایش بە خەسەخانەی بە مەڵامەتوو سەختی زامەکەیشۆ گیانش جە دەسدا.

چنی نزیکبیەیۆ دووەم ساڵیاڎو دەسپنەکەرڎەو سەرهۊردای ژەنی، ژیۋای، ئازاڎی تەنیا جە ماوەو حەفتەی ۋییەرڎەینە ١٨ چالاکۍ و هاموڵاتیۍ کورڎی جە شارەکا مەهاباد، شنۆ، پیرانشار، دیواندەڕە، مەریوان، سەوڵاوا و بۆکانەنە کە بەشێوەشا ئەنداماو بنەیانەو گیانبەخشایانۍ، جە لایەنو هێزە ئەمنییەکاوە گیریێنۍ.

جە ١٣و ئەیلولو ٢٠٢٢ێنە کناچە کورڎەو خەڵکو شارو سەقزی، ژینا ئەمینیە تارانەنە جە تەرەفو پۆلیسی بەنام ئەخلاقیوە بە بەهانۍ پابەندنەبیەی تەمامەتیش بە حیجابی زۆرەملێوە گیریا و بەمەڵامەتوو ئەشکەنجەی فرەیۆ کۆتە ئاژەو کۆمایۆ، یەرۍ ڕوۍ دماتەر و جە ١٦و ئا مانگێنە جە خەسەخانەنە گیانش سپارا، ئینەیچ کاروەدای فراوانش سەرو ئاستو ئێرانی و ۋەرکۆتوو کورڎەسانی شۊنیرە ئاما، بی بە سەرەتاو سەرهۊرداو ژەنی، ژیۋای، ئازاڎی.