جە حەفتەو ٩٥٨ ینە، ئەڎایاو شەممەی درێژەشا دا بە چالاکییەکەیشا جە مەیدانوو گەڵەتەسەراینە، پەی داواکەرڎەی چارەنویسوو گومبییا و کۊڵیایۊ جە دۊسییەکاشا. هامسەرۊکاو هەدەپەی، پەروین بوڵدانە و مەدحەت سەنجار، سەرۊکۍ گردینوو پارتوو هەرێمە دیموکراتیکەکا (دەبەپە)ی، کەسکین بایندەر، پەرلەمانتاراو پارتوو چەپی سەوزی، سیری ساکیک و مەراڵ دانیش بەشتاش، ئەنداماو لوجنەو ڕاوەبەرڎەی هەدەپەی موسا پیرئۊغلۊ و پەرلەمانتاروو پارتوو کرێکارا تورک ئەحمەد شیک، پەشتیوانیی چالاکییەکەو ئی حەفتەیە بێنۍ. 

پەرلەمانتارۍ گەمارۊ دریێنۍ... ئەدێچ گیریێنێ

وەختۍ پەرلەمانتارۍ لوۍ بەرەو مەیدانوو گەڵەتەسەرای، ناڕەزایەتییشا بەروست وەراوەروو تەوقدای، چا وەختانە پەرلەمانتاروو پارتوو چەپی سەوزی و سەرۊکپەرلەمان سەری سورەیا گەرەکش بۍ بلۊ دلۍ مەیدانەکەی وەلۍ پۊلیسی ناست.

ئەڎایاو شەممەیچ بەرەو مەیدانوو گەڵەتەسەرای لوۍ، چا وەختانە ڕووبەڕووۍ دایوەنەی بیێوە، پۊلیسی تەوقە دۍ و وەرڎەموو ڕاڕەوو چیچەکینە جادەو ئیستیقلالینە، چا وەختانە گەنجێوە دژوو پاشێلکارییەکاو پۊلیسی مرڎاوە، دایچشا وەنەو گەنجەکەی و ئەڎایاو شەممەی نیشانۍ سەرکەوتەی و ناڕەزایەتییشا بەروستە وەراوەروو پاشێلکارییەکاو پۊلیسی.

دماتەر پۊلیس ئەڎایاو شەممەیشا کەلەپچۍ کەرڎۍ و گێرتێشا، ڕۊنامەوانەکۍ گەرەکشابۍ ڕووەداکەی فاڕاوە، پۊلیس ناستش.

س.ز