ئەنڎاموو دەسەی ڕاوەبەری کەجەکەی، زوبەیر ئایدار ناڕەزایش ۋەران ۋەر بە قسەکا عەلی عەونی ئەنڎاموو سەرکردایەتی پەدەکەی نیشانە دا کە داواش کەرڎەبۍ دەوڵەتو ترکی ڕاوەبەرا پەکەکەی کەرۊنە ئامانج. ئایدار ۋاتش،''قسەکۍ عەلی عەونی یاگۍ شەرمەسارینۍ".
ئەنڎامو دەسەی ڕاوەبەری پەدەکەی، عەلی عەونی، کە ڕەوایی بە هجومە ئەرەگیریەکا دەوڵەتو ترکی ئەرەگیری پۍ سەرو پانیشتوو کورڎسانی مڎۊ ، زیاتەر چانەی سنورش بەزناو داواش کەرڎ کە ڕاوەبەرا پەکەکەی کریانە ئامەنج. عەونی جە قسەکاشەنە یاگەگېش دەسنیشان کەرڎۍ و ئانەش وست ڕووە کە پۍ چی فڕۊکە بۍ فڕۊکە وانەکۍ دەوڵەتو ترکی ڕاوەبەرا پەکەکەی مەکەرانە ئامانج.
ئەنڎاموو دەسەی ڕاوەبەری کەجەکەی، زوبەیر ئایدار قسېس پۍ ئاژانسو هەواڵی فرات(ANF)ی کەرڎ و پی جۊرە ناڕەزایی ۋېش بەربڕی،'' جە ڕاسینە وەختۍ ئینسان گۊسش ۋنەگېرۊ ، ئاڎ کورڎ نیا، دوژمنا، پېسەنە گۊش جە کەسۍ گیری کە گرڎ چېۋۍ ۋېش بە دوژمنی ورەتەن''.
دماتەر ئایدار درېژەش بەقسەکاش داو ۋاتش،''وەختۍ چی پڕۊسەنە ئینسان کەسۍ پی جۊرەیە مۋینۊ کە ئنڎە جە ڕاسی ۋېش دورا، جە ڕاسی ۋڵاتەکەیش دورا، ئنڎە داوا جە دوژمنەکاش کەرۊ و وەسف و سەناشا کەرۊ، ئینسان شەرم کەرۊ''.
کۍ تورکیاش ئارڎ پانیشتوو کورڎسانی؟
ئایدار ئی پرسیارېشە کەرڎۍ:''کۍ تورکیاش ئارڎ پانیشتوو کورڎسانی؟'' گرڎ ئینەی مۋینا، کە کۍ ئارڎ؟
کۍ بۍ ساڵەو ١٩٩٢ هامکاری دەوڵەتو ترکیش کەرڎ وخیانەتش کەرڎو سەرمەشقی و چەم ساغی تانکەکا دەوڵەتو ترکیش کەرڎ و هجومشا کەرڎ سەرو هېزەکا ئازاڎیی کورڎسانی؟
کۍ هامکارشا بۍ پۍ وەش کەرڎەو زیاڎ جە ١٠٠ بنکا جە پانیشتوو کورڎسانینە؟
کۍ پانیشتوو کورڎسانیش ڕووەو میتی و تەرەفڎاراشەرە کەرڎۊ؟
ئارۊ جە زاپ، مەتینا، ئاڤاشین، قەڵاو دژ بە دەوڵەتو ترکی کېن؟کۍ ڕاشا پنە مڎۊ و ڕاشا پۍ کەرۊوە پۍ ئایاگا کەگەرەکشانە پېش بلا؟''
ۋەرپرسیاری گرڎ چېۋۍ ئینا ئەستۊو پەدەکەینە
ئایدار باسش چانەیچ کەرڎ، کە ئۊباڵوو ئانیشا گرڎ ئینا ئەستۊو پەدەکەینە، کە عەلی عەونی ئینا ناۋەنڎەکەشانە و ۋاتش،'' چی ساڵا دماییەینە دەوڵەتو ترکی ئەرەگیری ئا بارەگا سەروازیۍ کە دەیان ساڵېن بە ڕەزامەنڎی پەدەکەی جە پانیشتوو کورڎسانینە یاگەگیرېش کەرڎېنۍ، زیاڎش کەردېنۍ. هاموەخت دەوڵەتو ترکی هجومە ئەرەگیریەکېش بەشېۋېوە فراوانۍ کەرڎېنۍ کە هامتاشا نیا، جە دهۊک تا هۊلېر و سلېمانی بە فڕۊکەی بۍ فڕۊکەوان هجومی تیرۊریستی ئەنجام مڎۊ. جە پانیشتوو کورڎسانی کە تۊرۍ گۊرەی جاسوسی و هەواڵگیری تورکی مەرزیابېرە، ئیسە پەدەکە بەئاشکرا دەسش کەرڎەن بە یاردیدای دەوڵەتو ترکی پۍ ئا مەنتیقا گەریلای کە دەوڵەت مەتاۋۊ دەسش پنەشا یاۋۊ. ڕاشا پۍ ۋەش کەرۊ پەشتیوانیشا کەرۊ. قسەکۍ عەونی ئاماژېنۍ پۍ ئاستوو هامکاریەکا بەینو پەدەکەی و ئەنقەرەی.
ڕۋەدایېن یاگۍ شەرمەساریا
ئایدار ۋاتش:"بۍ ئانەی شەرم کەرۊ،داوا جە دەوڵەتو ترکی کەرۊ و ماچۊ، ئېمە یاگۍ فەرماندەکاتا پنە ماچمۍ و نیشانەتا مڎەیمۍ، ۋەرپەرساکا کوشدۍ، پی جۊرە درېژەش بە قسەکاش دا: بە تورکیای ماچا شمە ئا زارۊڵە هەژارا کە خەڵەتیېنۍ گولە ۋاران کەرڎۍ، کۍ خەڵەتیان؟ ئانۍ گرڎ کە ئامېنۍ دلۍ ڕیزەکا ئی جمیەرەیە ، کەسۍ شکۊمەنڎۍ و گیانبازېنۍ. گرڎ لایۍ مزانا، کە جەنگاوەرۍ ئی جمیەرەیە پۍ چی ئامېنۍ دلۍ ئی جمیەرەیە چنی ۋەرگریشا جە کورڎسانی کەرڎەن بەتایبەتیچ جە ٤٠ ساڵی ۋیەرڎەنە''.
ئایدار ئاماژەش پانەی کەرڎ، کە قسەکۍ عەلی عەونی هاموەختېنۍ چنی ٣٩مین ساڵیاڎو هەڵمەتەو ١٥ و ئابی و ۋاتش،''وەختۍ ئینسان جە زۋان و کورڎېوە گۊشش چا قسابۊ، شەرم گېرۊشەرە''.
گەریلا جە گرڎ یاگۍ کورڎسانینە هەن!
ئایدار قسەکۍ عەلی عەونی کە ۋاتەبېش''پەکەکە شەنگالەنە چېش کەرۊ" ۋیر ئارڎۊ و ۋاتش:''ماۋېوە فرە سەرو ساڵیاڎو ٣ۍ ئابو ٢٠١٤ یرە، کە کۊکوشی ئېزیدیەکا ڕووەشدا، نەۋیەرڎەن، ١٠ ساڵۍ نەۋیەرڎەن، گرڎما شایەتېنمۍ، هېزەکۍ پەدەکەی گوایە ۋەرگری کەرېنۍ، شەنگالی ڕاوەبەر کەرېنۍ، بۍ ئانەی لا کەراوە و تەماشەو دمای کەرا بڕەمۍ، چنی داعشی ڕېکۍ کۊتۍ و بڕەمۍ. کۍ لۋا شەنگال و خەڵکش ڕزگار کەرڎ؟ئەگەر گەریلاکۍ کەشەکانە نەوەستېنېرە ، ئەگەر یەپەگەو یەپەژە ڕاڕەوشا نەکەرڎەبیېوە، کۍ خەڵک و شەنگالی ڕزگار کەرۍ؟ وەختۍ داعش هجومش کەرڎ ، گەریلاکۍ نەک حەرتەنیا شەنگال، بەڵکم هۊلېر و دهۊک و کەرکوک و مەخموریچشا پارېزنۍ. پەشتەو مدرامانو ئەفسانەیی کۊبانۍ گەلۍ ئازاڎیی وازۍ کورڎسانی دەورشا بۍ.
پۍ ئانەی ئا لەکەو شەرمەزاریە شارۊوە دەس بە هجومی کەرۊ. چنی متاۋۊ پا جۊرە قسۍ کەرۊ بۍ ئانەی ۋینۊ کە چېش کەرۊ؟ گەریلا هېزوو پارېزناو کورڎسانیا نەک پارچېوە، پەکەکە جمیەرو ئازاڎیی کورڎسانیا. جە گرڎ یاگۍ کورڎسانینە بیەیش هەن و بۊ. گەریلا شکۊو مەردم و کورڎسانی پارېزنۊ. کۍ چېش ماچۊ با واچۊ، کۍ و جە چ ئاستېنە هامکاری دوژمنی کەرا با کەرا، جە ئاکامەنە حەر جمیەری ئازاڎیی سەرگنۊ و ئەۋۍ تەرۍ ۋەردەمو تاریخی و گەلانە شەرمەزارۍ با''.
پەنەوازەن ئی عەقڵیەتە شەرمەسار کریۊ
ئایدار سەرنجش وست سەرو قسەکا عەونی و ۋاتش:''پەنەوازەن ئی عەقڵیەتەو ئی جۊرە کەسۍ کورڎسانەنە شەرمەسار کریا''. ئی عەقڵیەتە تەماشەکەرڎەو دوژمنایەتی شېۋیاو نا ڕۊشن کەرۊ بەهاکا کورڎسانی پېشکەش بە دوژمنی کەرۊ. پېسە ئانەی خیانەتەکەو ۋېس وەسۍ نەبۊ، داوا جە دوژمنیچ کەرۊ، ماچۊ'لودۍ ۋەرپەرسەکا، فەرماندەکا کوشدۍ''.
ئا چېۋۍ کە کەراشا مەۋیناشا، پا جۊرە قسۍ کەرۊ پېسە ئانەی سەرکرڎەکۍ پەدەکەی گرڎ ڕۋۍ چنی ئەردۊغانی، میتی و بکوشەکا هامکاری نەکەرا، پېسە ئانەی جە پانیشتوو کورڎسانینە چەنی ئاڎیشا نەجماوە. ئی جۊرە قسە کەرڎەیە یاگۍ قبوڵکەرڎەی نیا.
پەنەوازەن گەلەکەما ئینەی بۋینۊ، پەنەوازەن گرڎ لایۍ ئینەی ۋینا وجە چوارچېوەو هەڵۋېسو ئازاڎیې و شکۊو گەلوو کورڎسانی جە ۋەران ۋەرو ئی هەڵۋېسەینە مرڎاوە. مشۊم ئی عەقڵیەتە جە گرڎ ڕۋېوە شەرمەزار و سەرکۊنە کریۊ''.
هـ . ش
