یەکینەکانی مدرامانوو شەنگالی (یەبەشە) و یەکینەکاو ژەناو شەنگالی (یەژەشە) بە مەراسیمێوە سەروازیی شکۊداری جە کەسایەتیی مام زەکیی شەنگالی، سەعید حەسەن سەعیدی، یاڎوو گەشمەرڎاو سکینۍ و سەرجەموو گەشمەرڎاو مانگەو ئابیشا بەرز ئرمانا و داواشا جە گرد لێوە کەرڎە، پەی پارێزنای ڕەنج و مانیای گەشمەرڎا، پەی شەنگالێوە ئازاڎی و عێراقێوە دیموکراتیکی کۊشیا.

مەراسیمەکەنە خەلیل عەرەب بە نامۍ فەرماندەیی یەکینەکاو مدرامانوو شەنگالی (یەبەشە)ی و یەکینەکاو ژەناو شەنگالی (یەژەشە)یۊ قسێش کەرڎۍ. خەلیل جە کەسایەتیی مام زەکی و سەعید حەسەن سەعیدی و گەشمەرڎاو خەسەخانەو سکینێنە یاڎوو گردوو گەشمەرڎاو مانگەو ئابیش کەرڎۊ. هەرپاسە باسش چا ڕووە سەخت و دڵتەزنا کەرد کە گەلوو ئێزیدی و عەرەبی پۊرەشرە ویەرڎێنۍ و واتش: " ئێمە ڕووبەڕووۍ فرە کۊکوشییە دژوارا و فرە حاڵەتاو گەشمەرڎەبییەی بیێنمێوە. جە مانگەو ئابینە چەتەکاو داعشی شەنگالنە هجوومشا کەرد سەروو گەلەکەیما. بەتایبەتی گەلوو ئێزدییشا کەرد ئامانج. ئی گەلە تارێخەنە ٧٣جارۍ کۊکوش کریان و ٧٤مین کۊکوشیی ڕاو چەتە فاشیستەکاو داعشیوە بییەن".

'مام زەکی پرڎێوە قەوەتە بۍ بەینوو گەلوو ئێزدی و عەرەبینە'

 ئینجا باسوو دەوروو مام زەکییش دلۍ گلێرگەی ئێزیدی و عەرەبینە کەرد و واتش: " ١٥و ئابوو ٢٠١٨ دەسوو خیانەتی یاوا مام زەکی شەنگالی. جە کەسایەتیی مام زەکینە هێماو ئی شۊڕشەیە کریا ئامانج و گەشمەرڎە کریا. ئی هێمۍ کە دژوو ئا ئاژاوە و ناکۊکیاو داعشینە دلۍ گلێرگەینە سازش کەرڎەبۍ، کۊشیا و پەی سەرجەنۊ بونیاڎنیایۊ شیرازەی کۊمەڵایەتی، کە داعش و هامکارەکێش ورشاشانابێوە فرە هەوڵێش دۍ و مانیا. مام زەکی دەورێوە گرنگش بۍ ئاوەدانکەرڎەیۊ و گێڵایۊ خەڵکوو شنگاڵینە، چە گەلوو ئێزدی و چە گەلوو عەرەبی. بی بە پرڎێوە پتەوە بەینوو پێکئامایەکاو ئێزیدی و عەرەبینە. پەوکای پەنەوازا پەی ڕەنجوو هامڕا زەکی و گەشمەرڎای تەریما ئا پرڎۍ پتەوتەر و خاستەر کەرمێ".

' نرخە و شییەینەکەیش چێش بۊ با بۊ، هەنگامە مەنیەیمۍ پەی دمای'

 خەلیل عەرەب واتش، کە بە خەم و پەژارێوە فرەوە فەرماندە سەعید حەسەن سەعیدی یاڎ کەرووە و پێسە بەرڎەوام بی؛ "ئاڎ فەرماندێوە ئازا بۍ، کە دەوری گەورەش بۍ جە ڕاگێریکەرڎەینە جە ئەمرە و کۊچنەکەرڎەی خەڵکوو شەنگالینە. ئاڎیچ وێنەو مام زەکی دەوڵەتوو تورکی کەرد بە ئامانج. ئێمە ئارۊیچەنە شۊنەو هەنگامەکاو ئاڎی گنمۍ. گرنگ نییا چێشش مشۊنە، حەرگیز چی ڕێنە هەنگامێوە پەی دمای مەنیەیمۍ، بەپێچەوانەوە گرد ڕوۍ پەی وەڵۍ ملمێ".

درێژەو قسەکایچشنە واتش: "ئێمە پێسە یەبەشەی و یەژەشەی بە مەبەسوو یاوای بە ئامانج و ئاواتەکاو گەشمەرڎا پێسە مام زەکی، سەعید، دژوار، زەرڎەشت، ماهیر تەیاوی و ئا گەشمەرڎا، کە ساڵەو 2019 خەسەخانەو سکینێنە بە فڕۊکەی دەوڵەتوو تورکی گەشمەرڎۍ بیۍ، سەروو ئی خاکە مەبارەکەیۊ کۊشیەیمۍ. ئاڎۍ ڕۊشنیی رۍ و مەشخەڵەو ئازاڎیمانۍ. ئێمە ئارۊ کە هەنمۍ، سایۍ نامۍ ئا قارەماناوە کۊشیای و ڕۊحوو گیانبازیی ئاڎیشاوەن. وەروو ئانەیە هەقەشا جە دوژمنی کەرمێوە، چە هەواڵدەرۍ و چە سیخوڕەکێشا سەروو زەمینیوە چە دەوڵەتی فاشیست بۊ، ئێمە هەقەشا کەرمێوە و درێژە بە کۊشیایما مڎەیمێ".

خەلیل ئانەیچش وست ڕووە، کە دوژمناو گەلوو کوردی و بەتایبەتی دوژمناو گلێرگەو ئێزدی گەرەکشانە دەسەڵاتوو وێشا پێسە ساڵانی وەڵینی ملوو خەڵکیرە سەپناوە و واتش؛ "هامڕایە ئازیزا، چۍ ڕوانە سەرەمڕ دوژمن کەرۊما ئامانج. ١٥و ئابی، ڕۊو ژیوایۊ، ڕۊو هەڵمەتەو ١٥و ئابین، کە مەعسوم کۊرکماز دژوو سیستموو فاشیستی تورکی دەسش پەنە کەرد، پی بۊنەوە یاڎوو ئا ڕوە گەورەیە و سەرجەموو گەشمەرڎەکاما بەرز مرمانمۍ. سپاس و سڵامما ئاڕاستەو گەریلاکاو ئازاڎیی کەرمۍ، جە کەشە ئازاڎەکاو کورڎسانیوە ئامی دەموو گەلەکەیماوە و جە کۊکوشیی چەتەکاو داعشی ڕزگارێشا کەردیمۍ. ئا جەنگاوەراو ئازاڎییە کە ئێمەشا دەسوو چەتەکاو داعشیوە ڕزگارۍ کەرڎۍ خاک و شکۊو ئێمەشا پارێزنا، جە سایۍ گیانبازیی ئاڎیشاوە، ئارۊ وێما بەرمۍ ڕاوە، بەبۍ ئانەیە چەمێما دەسوو کەسیوە با و پەنا پەی کەسی بەرمۍ. سەرەڕاو هجووم و فڕۊکە سیخوڕییەکاو دەوڵەتوو تورکیچ، وێگێریما کەرڎەن و ئارۊیچ چا هەلومەرجەنە ئا گەشمەرڎاما یاڎ کەرمێوە و وەعدوو هەقسانایۊشا مڎەیمۍ. خەبات و کۊشیایما چەنی گردوو پێکئامایەکاو شەنگالی پەرە پەنە مڎەیمۍ. حیچ جیاوازیێوە بەینوو شۊنکەوتاو ئایین و مەزهەبەکانە نییا، جە ڕاو ئەندێشە و فەلسەفەو ڕابەر ئاپۊیۊ گردوو پێکئامایەکا پارێزنمۍ. دوژمنێما گەرەکشانە سەروو ونەو گەلەکەیماوە بژیوا و حوکمڕانی ساڵانی وەڵینیشا ئەوەخوای کەراوە، وەلۍ ئێمە پێسە هێزەکاو وێپاریزنای حەرگیز ڕا مەدەیمۍ چێوی چانە ڕووە بدۊ.".

"پەنەوازا گردما پەی شەنگالێوە ئازاڎی و عێراقێوە دیموکراتیکی کۊشیەیمێ"

ئاخروو مەراسیمە سەروازییەکەینە، خەلیل عەرەب بە نامۍ فەرماندەیی یەبەشەی و یەژەشەیۊ واتش؛ "وەڵۍ گرد چێوێوەنە ئێمە پێسە یەبەشەی و یەژەشەی و گردوو گەلەکەیما، پەی پارێزنای ڕەنجوو گەشمەرڎا، پەنەوازا گردما پەی شەنگالێوە ئازاڎی و عێراقێوە دیموکراتیکی کۊشیەیمۍ. جارێوە تەر ماچمۍ سوپاسوو ئا دەوڵەتا کەرمۍ، کە گەرەکشانە پاڵپەشتی و هامکاریی شەنگالی کەرا، وەلۍ پانیشا کە هجووم کەرا سەروو شەنگالی ماچمۍ کەس مەتاوۊ وەر بە ڕۊشنایی وەرەتاوو ئازاڎیی گێرۊ. پەی ئامایدیی ئامانج و حەزوو گەشمەرڎاما، بەرڎەوامۍ بیمۍ جە ڕا و ڕێبازیشا و حەرگیز هەنگامە پەی دمای مەنیەیمۍ. جارێوە تەر یاڎوو گردوو گەشمەرڎاو جینۊسایدی، بەتایبەتی گەشمەرڎە مام زەکی و گەشمەرڎە سەعید و گەشمەرڎاو خەسەخانەو سکێنۍ بە ڕێزۊ یاڎ کەرمێوە. ئاخرۊ ماچمۍ گەشمەرڎۍ مەمرا و ئینۍ دڵمانە. ".

 مەراسیمەکە بە واتەیۊو دروشموو "بژیوۊ سەرۊک ئاپۊ"، "بۍ سەرۊکی ژیوای مەبۊ" دماییش ئاما.

س.ز