"داوا جە ڕێکوزیایا و ئەرەمەرزیایەکاو مافوو ئینسانی بەتایبەتی ئانۍ داکۊکیکارۍ مافوو ڕۊنامەوانانۍ، کەرمۍ کە هەرمانەی ویژدانییەو وێشا بیاونا یاگۍ و وەراوەروو کەرڎەی ئامانجوو ڕۊنامەوانا و خەڵکی مەدەنی، لاو دەوڵەتوو تورکیوە بێدەنگۍ نەبا".
یۊبییەی ئەرەیاونای ئازاڎی (یەرەئا) سەبارەت بە هجوومکەرڎەی سەروو میدیاکاراو ژەن تیڤی، ئەرەیاوناێوەش وەڵا کەرڎۊ.
ئەرەیاوناکەو یەرەئای پێسنەن:
"ئەوەڵوو ئاڵۊزییەکاوە سوریانە، تا ئیساتۍ دەوڵەتوو تورکی ئەرەگیری بەرڎەوام ئینا حەوڵۍ بەیاگەیاونای سیاسەتوو ئەرەگیکاریی وێشنە دژوو سەرنیشتی و وەرکەوتوو سوریای و گرڎوو مەنتێقەکەی. پەی ئانەیچە پەشتیوانیی گرڎوو گرووپە چەتەکا پێسە داعشی و نوسرەی و دەیان گرووپای تەری هامشێوەی کەرۊ.
میدیاکارۍ حەر جە ئەوەڵوو شۊڕشیوە و تا ئیساتۍ پەی ئاشکراکەرڎەی پلانە و سیاسەتەکاو دەوڵەتوو تورکی و لایەنە دژبەرەکای تەری، بۍ مردای دلۍ هەوڵ و کۊشیاینە بیێنۍ و جووڵەی بەرڎەوامشا بییەن. حەر پەوکای دەوڵەتوو تورکی فرە کامێرە و قەڵەموو ئەرەیاونای ئازاڎی تەرسۊ. وەروو ئانەینە هجووم کەرۊ سەروو خەباتکاراو ئەرەیاونای ئازاڎی.
ڕۊو ٢٣ۍ ئابوو ٢٠٢٣ سەروو ڕاو قامیشلۊی و عامودەیۊ، سەیاریوە ژەن تیڤی، کە بە مەبەستوو ئامادەکەرڎەی هەواڵی بارەگاکەشا جیا ئاست، لاو فڕۊکێوە بێفڕۊکەوانوو دەوڵەتوو تورکیوە بۊردومان کریا. سایقوو سەیارەکەی گەشمەرڎە بی و پەیامکیانێوە کەناڵوو ژەن تیڤیی بریندارە بییە.
چێوەڵتەریچ سەرێکانی و دێرکنە هامڕا ڕۊنامەنویسەکێما سەعد ئەحمەد، محمەد ڕەشۊ، وڵات، ئیسماعیل عەبدوڵڵا وەختوو بەڵگەکەرڎەی دڕندەیی وەراوەروو خەڵکی مەدەنیینە، بە هجووموو فڕۊکەکاو دەوڵەتوو تورکی گەشمەرڎۍ بیۍ. هەرپاسە چنڎ ڕۊنامەنویسێچ بریندارۍ بیۍ.
دەوڵەتوو تورکیای پی هەرماناشە گرڎ پەیمان و یاسا میاننەتەوەییەکاو مافوو ئینسانی وەرەچەماو گرڎوو دنیێوە پاشێلۍ کەرۊ، بەداخۊهامپەیمانیی میاننەتەوەیی، ڕووسیا، نەتەوەیۊگێرتەکۍ، گرڎوو ڕێکوزیایەکاو مافوو ئینسانی، بەتایبەتی سەندیکاو میاننەتەوەیی ڕۊنامەنویسان و ڕێکوزیاو پەیامکیانە بێسنوورا بە بێدەنگ پەی ئی هەرمانۍ مدیا.
یۊبییەی ئەرەیاونای ئازاڎی (یەرەئا) کە وەرپەرسا جە بەڵگەکەرڎەی و تۊمارکەرڎەی تاوان و کرڎەوەکاو دژ بە ڕۊنامەنویسا و میدیاکارا، وەڵۍ گرڎ چێوێنە سەرەوەشی وەنەو بنەیانەو گەشمەرڎەکەو ژەن تیڤی کەرۊ و هومێدوو زوو خاسبیەیۊ پەی پەیامکیانەکەی موازۊ، کەرڎەی ئامانجوو ڕۊنامەوانا لاو دەوڵەتوو تورکیوە بەتندی شەرمەزار کەرۊ.
هاموەخت داوا وەنەو ڕێکوزیا و دامودەزگاکاو مافوو ئینسانی بەتایبەتی ئانۍ داکۊکیکارۍ ڕۊنامەنویسانۍ کەرۊ، کە هەرمانەی ویژدانییەو وێشا بیاونا یاگۍ و بێدەنگۍ نەبا وەراوەروو بەئامانجگێرتەی ڕۊنامەنویسانە و خەڵکی مەدەنیی مەنتێقەکەینە لاو دەوڵەتوو تورکیوە.
س.ز
