هامقسەکەروو پارتوو چەپی سەوزی، ئیبراهیم ئەکین، ئاماژەش پانەیە کەرد، گۊشەگیری سەروو ڕابەروو گەلوو کوردی عەبدوڵڵا ئۊجالانی ئیساتۍ تەماموو تورکیاینە وەڵا بییەنۊ، واتش: "گۊشەگیری تاوانێوە دژەئینسانییەتا، مشۊم دژوو گۊشەگیری، یاسایەکا بپارێزنمۍ".
ڕێکوزیایەکاو پارتوو دیموکراتیکوو گەلا (هەدەپە) و پارتوو چەپی سەوزی ئەزمیرنە، چوارچوەو هەرمانەکاو ژووژنایۊنە، هۊڵوو هونەروو پارکی کولتووریی ئەزمیرینە، کۊنفرانسێوەشا بەست. هامقسەکەروو پارتوو چەپی سەوزی، ئیبراهیم ئەکین، پەرلەمانتاروو پارتوو چەپی سەوزی ئەزمیرنە، بورجوگول چوبوک، ئەنداماو پارتەکەی بەشدارۍ کۊنفرانسەکەی بێنۍ. پانکارتوو "ئێمە گرڎما پێوەرە، دژوو گۊشەگیری، ئازاڎی؛ دژوو جەنگی، ئاشتی" جە هۊڵوو کۊنفرانسەکەینە ورواسیا.
ئەنداموو لوجنەو ڕاوەبەرڎەی ناوەندی هەدەپەی، ئەلیف بوڵوت، جە ئەوەڵوو کۊنفرانسینە، واتش: "چوارچوەو هەنگامەو ژووژنایۊنە، ئێمە قسەوباسوو گەلی و کۊنفرانس بەسمۍ، جە ئەنجاموو قسەوباسەکانە نەخشەڕێوە دەسنیشان کەرمۍ. حوکمەتێوە ئینا وەراوەروو ئێمەوە، حەرکەس پەی مافوو وێش کۊشیۊ، پێسە دوژمنی وینیۊ، مشۊم ئێمە دژوو ئینەیە بە هامبەشی کۊشیەیمێ".
هامقسەکەروو پارتو چەپی سەوزی، ئیبراهیم ئاکین، باسش جە سیستموو گۊشەگیری ئیمراڵینە کەرد و واتش: "ئێمە ئینایمۍ سەرڎەمێوەنە، گۊشەگیری سەروو بەڕێز ئۊجالانی، ئارۊ تەماموو تورکیاینە وەڵا بییەنۊ. گۊشەگیری تاوانێوە دژەئینسانین. مشۊم ئێمە و گرڎوو ئا کەسا وەراوەروو تاوانەکاو دژوو ئینسانیەتی کۊشیا، پێوە هەرمانە کەرمۍ. دیای سیاسیما حەرچی بۊ با بۊ؛ مشۊم دژوو ناداڎی هەرمانە کەرمۍ پەی پارێزنای یاسایەکا، وەڵۍ گرڎ چێوێنە، ناچارێنمۍ ماف و ئازاڎییەکا بپارێزنمۍ.
س.ز
