١٨ و ١٩ و ئابی، بەیروت و پایتەختو لوبنانینە، کۊنفرانسوو ژەنا ۋەرکەوتوو میامینی و سەرنیشتوو ئەفریقای، بەسەرمەشقی ڕېکوزیاو ژینی- ژەناو جەمەو کولتوری وگلېرگەیی نەورۊزی، بە دروشمەو،"ژەنی، ژیای، ئازاڎیی، تەجروبەو تەڤگەرو ژەنا پۍ ڕزگاربیەی جە قەیرانە هەرېمیەکا" بەبەشڎاری زیاڎ جە ١٠٠ ژەنا، جە ١١ ۋڵاتېوە لۋاڕاوە،ئارۊیچ جە ئاخر ڕۊشەنە، ئەنجامنامەو کۊنفرانسەکەی ۋەڵاکریاوە.

بە ئاماژەدای بە نەواخن و ئا گفتوگۊیا کە جە ماوەو دۋۍ ڕووا کۊنفرانسەکەینە کریۍ، جە چن خاڵېوەنە ئەنجامنامەکە پی جۊرە وزیا ڕووە.

١. پەشتیوانی کەرڎەی جە مدرامانو ژەنا ئېزدی، ئەڤغانی، ئېرانی،کورڎ، فەڵەستینی بەتایبەتی وگرڎوو ژەنە چالاکەکاو  مەنتیقەکەی  بەگرڎی دژ پا هېزە تاریک پەرسا، کە جە ۋیری تاریکینە هامشېۋېنۍ گەلاو گلېرگەکا بە گرڎیی ژەنا بەتایبەتی کەرانە ئامانج.

٢. ئیسفاڎەکەرڎەی جە تەجروبەو ژەنا کورڎی، پۍ ئانەی با بە نمونېوە پۍ ژەنا و گەلا مەنتیقەکەی، حەرپاسە هەرمان کەرڎەی سەرو پەرەپنەداو سیستمی هامسەرۊکی.

٣. ڕېکوستەو کۊنفرانسېوە مەنتیقەیی ژەنا بە ئامانج و هەماهەنگی پەرەپنەداو خەباتو هامبەشو ژەنا یۊوستەی تەجروبەو ئیسەو ژەنا، پېسە ئامڕازۍ پۍ ۋېپارېزنای ژەنا ۋەران ۋەر بە ئەقڵیەتی پیاسالاری بە گرڎوو دامو دەزگاو ئامڕازەکاشۊ. حەرپاسە سیاسەتە پڕاکتیکیەکا جە ڕاو پېکئارڎەی ناۋەنڎە تایبەتمەندەکاوە ڕېک وزۊ بە ئامانجو ئارڎەی دی بەرېوە هامبەشی مەنتیقەیی ژەنا.

٤. ئەرەمەرزناو پەیماننامېوە هامبەشی هەرېمی ژەنا پۍ کۊکەرڎةیۊ دیدە جیاجیاکا ژەنا، سەرجەنۊ لۋایۊ پۊرە بە زاراوە سەرەکیەکارە کریۊ پۍ واوەی پېناسەکەرڎەیۊیشا چنی دیدۍ هامبەش و ژەنا، چی چوارچېوەیچەنە ئیسفاڎە جە زانستو ژنۊلۊژیی هۊرگیریۊ هەرمانە پۍ ۋەڵاکەرڎەیۊیش کریۊ.

٥. پېکئارڎەو لوجنەو مافو مرۊڤی و دەسپنەکەرڎەو هەڵمەتە ستراتیجیە مەنتیقەییەکۍ پۍ داواو ئازاڎکەرڎەو فەیلەسوفو  ۋیری ئازاڎیی ڕېزدار عەبدوڵا ئۊجالانی کە هەمیشە ۋاتەنش خەباتو ژەنا زامنو ئاشتی ۋەردەوام و دیموکراسی ڕاستەقینەن.

٦. پېکئارڎەو تۊڕېوە مەنتیقەیی پۍ ۋەرگیریکەرڎەی جە گرڎوو گیریایا سیاسی بە گرڎی و ڕېزدار عەبدوڵا ئۊجالانی بەتایبەت، چونکی ئاڎۍ نوېنەرایەتی دەنگی ئازاڎیی و ئشناسنامەو گەلەکەیشا کەرا.

٧. ۋەرەنگاربیەی تنڕەوی ئاینی بە گرڎوو فۆڕمو ڕەوتەکاشۊ دژایەتیکەرڎەی سیاسەت و پاکتاوکەرڎەی ژەنا و گرڎوو سیاسەت و پڕاکتیزە ستەمکاریەکا، کە دوژمنایەتی ژەنا کەرا ، بژیۋۊ خەباتی هامبەشوو ژەنا.

هـ . ش