ئەنجومەنوو کۆنگرەی ستار ی، هجومەکەو دۊڵەتوو ترکی ئەرەگیریش پۍ سەروو ترۊمبېلېوە ڕۊنامەوانا ژەن تی ڤی شەرمەسار کەرڎ و داواش جە گرڎوو ئەرەمەرزیاکا مافوو مرۆڤی کەرڎ، جە وەران وەر پا هجوما بێدەنگۍ نەبا و هەڵۋێسشا بۊ.
ئەنجومەنوو کۆنگرەی ستاری جە سەرنیشتوو ۋەرکەوتوو سوریای، سەبارەڎ بە هجوموو فڕۆکەی بێفڕۆکەوانی دەوڵەتوو ترکی ئەرەگیری پۍ سەروو ترۊمبېلېوە ڕۆنامەنۋیسا سەروو ڕاو عامودێ-قامیشلۆی، کە بە مەڵامەتشۊ کارمەندێوە ژەن تی ڤی گەشمەرڎە و ڕۆنامەنۋیسۍ تەر زامڎار بی، ئەرەیاۋنېوەش ۋەڵاکەرڎۊ.
جە ئەرەیاۋناکەنە ئامان: "دەوڵەتوو ترکی سەرەمڕە جەنگی کۆکوشی دژ بە بیە و ئیراڎە و ژەنا و کورڎا و بەتایبەتی دژوو بیەو گرڎوو پێکئاماکا سەرنیشتو و ۋەرکەوتوو سوریای ڕاوەبەر کەرۊ. بە بێ ئانەی حیچ یاسا و ڕێسېوە مافوو مرۆڤی بشناسۊ، جەنگېوە بۍ ئەخلاقانە جە هەرێموو پانیشتوو کوردسانی ڕاوەبەر کەرۊ.
جە بەشێوە تەرو ئەرەیاۋناکەینە ئامان، ئاخېزوو ۋەرنیشتی بە دوژمنوو ۋېش مزانۊ و بە گرڎ جۆرێوە هجوم کەرۊ. دە ساڵېن ئاسایش، سەقامگیری، ژیۋای ژەنۍ، زارۊڵا، پیایاو ژیوگەشا ئینا چېروو تەرسېنە.
ئەنجومەنوو کۆنگرەی ستاری ئاماژەش پۍ ئانەیچ کەرڎەن، "دەوڵەتوو ترکی پاڵپەشتی چا گرووپە تیرۆریستی و دژە ئینسانیا کەرۊ، کە مەنتیقەکەنە کۆکوشی ئەنجام مڎا. ئی جۆرە کردەوۍ هەڵای ۋەردەوامېنۍ. فرەو مەنتیقاشا ئەرەگیر کەرڎەن، پۍ ئانەی بە ئامانجەکاشا بیاۋا، کە فاڕای دیمۆگرافیاو مەنتیقەکەین، خەڵکشا ناچار بە کۆچکەرڎەی کەرڎەن. سروشت دلېنەبەرۊ، درەختۍ بڕۊ، ئاوی سەرو مەنتیقەکەی گېرۊوە. سەرمەشق و ڕاوەبەرا ژیۋای ئازاڎیی بە شێۋېوە چەپەڵ و دور جە ئەخلاقی کەرۊ ئامانجوو ۋېش.
حەر جە ئەرەیاۋناکەنە ئامان، جارێوەتەر دەوڵەتوو ترکی بە فڕۆکەی بێفڕۆکەوان هجومش کەرڎ سەروو گرووپێوە کەناڵ و ژەن تی ڤی، جە وەختېنە بەپاو یاسا میان نەتەوەییەکا مەبۊ میدیاکارۍ و ڕۆنامەنۋیسۍ کریا ئامانج. بەڵام پۍ دەوڵەتوو ترکی، سەرنجوو جەهانی مەلۊ سەرو تیرۆری و کردەوە ئینسانیەکا و ئا هجومە ترسنۊکیا پۍ سەروو میدیاکارا ئەنجام مڎۊ.
جە دما دمایی ئەرەیاۋناکەینە ئامان، ئێمە پېسە ئەنجومەنوو کۆنگرەی ستاری، دەوڵەتوو ترکی، کە بە ئەنجامدای هجومی نا ئینسانانە ژەنا، زارۊڵا، خەڵکی مەڎەنی و میدیاکارا کەرۊنە ئامانج، ئیڎانە کەرمۍ، داوایچ جە گرڎوو ئەرەمەرزیاکا مافوو مرۆڤی کەرمۍ چا بارۊ بێدەنگۍ نەبا و ئەرک و ۋەرپرسیاریی ۋېشا جابەجۍ کەرا.
هـ.ش
