جە ئەرەیاۋنېوەنە مەڵبەنڎوو دووۍ کەرکوک و یۊبیەی نیشتمانیی کوردسانی (یەنەکە)ی ئاماژەش پانەی کەرڎەن: " چنی نزیكبیەیۊ خیانەتوو گۊرەی ٣١و ئابی و یاوو هۊرچنیەی ئەنجومەنوو پارێزگاكا، پارتی (پەدەکە) پۍ پەردەپۆشكەرڎەی ئا خیانەتە گۊرەیە دەرحەق بە كۆمەڵا خەڵكوو كوردسانی کەرڎش، چن ڕۋېوەن جە كەركوك، بە بەهانۍ هۊرگېرتەیۊ بارەگاكەیشا، جەنجاڵیېوە فرەشا پۍ هەرمان و كەسابەتوو هاموڵاتیا كەركوكی ۋەشکەرڎەن".

باسش چانەیچ کەرڎەن: " چېگۊ گەرەکمانە، ئا ڕاسیا پۍ گرڎ لایۍ وزمۍ ڕووە، ئا لایەنۍ ئیسە ڕای سەرەكی كەركوك - هۊلێریشا، وستېنەرە، دۆسەكۍ پارتینۍ، بڕېشا هۊلێرەنە نیشتېنېرە و بڕېچشا جە بەغڎانە هامپەیمانۍ پرۆسەی سیاسیی ئاڎینۍ".

مەڵبەنڎوو دووۍ یەنەکەی ئەرەیاۋنانش:  پەدەکە "جە حكومەتوو عێراقینە یاگەگیروو سەرۆك وەزیرانی و وەزیروو بەریش هەن، جە ئەنجومەنوو نوێنەرانە، یاگەگیروو سەرۆكوو پەرلەمانی و ۋەرپرسیاری لوجنەكا پەرلەمانیش هەن، بەڵام چی دۆسییەنە، ۋېشا شارتەنۊ و بێدەنگییشا هۊرچنیەن، كەچی سەروو هۊرگېرتەی پشكی و مەنسەبی، جەنگشانە. بێ ئانەی دەسی سیاسیی ۋېشا پۍ گېڵایۊ دەستووری و دیموكراتیانەی بارەگاكاشا وزا هەرمانە، كە ئانە مافێوە فرە حزبی و دیموكراتیی و دەستووریین و حیچ پەنەوازش بە هاندای نەتەوەیی و گرژی بەینوو پێكئاماکا نییا".

یەنەکە ۋیریچش ئارڎەنۊ، "ئی هەنگامۍ پەدەکەی پۍ کەرکوکییەکا یاگۍ تەعاجبی نیا و جە ۋیەرڎەیچەنە قۊرتۍ فرۍ هەمە چەشنېشا ۋەش کەرڎېنۍ".

تەئکیدش چانەیچ کەرڎەنۊ: " پۊکاتی ئی ڕووەدایۍ ئیسەی ڕووەمڎا، كە هاموەختا چنی خیانەتوو ٣١و ئابی، پۍ جە ۋیربەرڎەیۊ ئا تاریخە تاڵەیە کە سەروو میللەتەكەیمارە ئامان، كەشفكەرڎەی دەسیشانە، كە تا هېزی داواو ئانەی کەرېنۍ بە شكۆ و بە ئاڵاو كوردسانیۊ گېڵاوە، كەچی ئیسە مەتاۋا وەرگیری جە بینایەكۍ وېچشا کەرا".

جە دمادمایچەنە مەڵبەنڎوو دووۍ یەنەکەی جە کەرکوک ئەرەیاۋنانش: "جە سۆنگەو هەسکەرڎەی بە ۋەرپرسیاری و هەستیاری ئاژەو كەركوكی، حۊڵ و ئاساییكەرڎەیۊ ئاژەکەی مڎەیمۍ و داوا جە حكومەتوو لۆكاڵی كەركوكی و هێزەكا سوپای و داوا جە پارتیچ کەرمۍ ئی مژارەیە  بە یاسا و دەستوور نەك بە جەمسەرگیری و گرژی، چارەسەر کەرا تاوەكو ئیتر هاموڵاتیەکېما نەبا بە قوربانی موزایەدەکا پارتی پۍ هۊرچنیەی و گرڎ لېوەیچ كەشۍ پەنەواز پۍ دیموكراسیی و خەباتی مەڎەنی مەیسەر کەرا".

هـ.ش