سوپای ئەرەگیرکەرەو تورکی و چەتەکێش دەگایەکا تەل ڕەفعەتوو کانتۆنوو عەفرین-شەهبایشا تۆپوارانێ کەردێ. خەڵکوو هەرێمەکەی ناڕەزایەتییشا بەروست و واتشا: "ئێمە جە چەتەکاو دەوڵەتوو تورکی نمەتەرسمێ و چێش مکەرا با بکەرا، هەرێمەکەیما جیا نمازمێ".
سوپای ئەرەگیرکەرەو تورکی و چەتەکێش درەنگانی هیزی شەوێ ێرێ دەگایەکاو شێخ عیسای و حربلی و ئوم ئەلحوشی و ئوم ئەلقوراو شاروو تەل ڕەفعەتوو کانتۆنوو عەفرین-شەهبایشا تۆپوارانێ کەردێ.
سوپای ئەرەگیرکەرەو تورکی و چەتەکێش ئا دەگێشا بە تۆپێ و هاوەنێ کەردێنێ ئامانج.
ئەنجاموو هجوومەکەینە ئاژەڵ و یانێ و موڵکوو هاموەڵاتا زەرەرێوی فرەش پنە یاوا.
چی بارەوە ئەرەنیشتاو هەرێمەکەی قسێشا پەی بۆ ئاژانسوو هەواڵوو فورات (ANF)ی کەردێ.
"ئێگە یاگێ مدرامانییەنە، ئێگەی جیا نمازمێ"
ئەرەنیشتێوە بە نامێ محەمەد عەلی-یوە ئەرەیاوناش هجوومەکە دەوروو سەعات ١و شەوێ دەسش پەنە کەرد و تا سەعات ٣ بەردەوام بی، ئەوەخوایش کەردۆ ئاژەڵ و یانە و موڵکوو خەڵکی دلێنە شیێ و واتش: "ئامانجوو دەوڵەتوو تورکی ئانەنە گەل هەرێمەکەی چۆڵ بکەرۆ. بەڵام ئێگە یاگێ مدرامانینە و گەل ئێگەی جیا نمازۆ".
ئاماژەش پانەیە کەرد، هیزی نزیکەو ٥٠ هاوەنا نریێنێ مەنتێقەکەیوە، پەوکای شەوێوە کەس نەوتەن، بەڵام وەراوەروو هجوومەکانە سەرە نمەکۆمنارە و واتش: "با جیهان بزانۆ، هەرگیز ئێگەی جیا نمازمێ و تا ئاخر مدرامان مکەرمێ. کەس نمەتاوۆ ئیرادەو ئی گەلەیە بماڕۆ".
"جە دەوڵەتوو تورکی و چەتەکاش نمەتەرسمێ"
هاموەڵاتێوە بە نامێ فیراس ئیبراهیمیوە ئەرەیاوناش دەوڵەتوو تورکی ٦ ساڵێن هجووم مکەرۆ سەروو هەرێمەکەی، واتش: "دەوڵەتوو تورکی چێشش جە ئێمە گەرەکەن؟ دەرەقەتوو هێزە سەروازییەکاما نمێ، ئینجا هجووم مکەروو سەروو گەلی. چێگە گەل تەنیا بە هەرمانەو وێشەوە خەریکا، کەچی حەر ڕووبەڕوو هجوومی بیمێوە.
ئێمە کوردێنمێ، با بزانیۆ، ئێمە نە جە دەوڵەتوو تورکی و نە جە چەتەکاو و نە پەدەکەی خیانەتکاری کە هامکاروو دوژمنیا، نمەتەرسمێ".
