فەرماندەیی (یەرەکە)ی ئاماژەش پانەیە کەرد، کە هجوومەکاو سوپاو تورکی ئەرەگیری جە ڕاو فرۊکەی بێفڕۊکەوانیوە پەی سەروو مەنتێقەکاو ئاسۊسی و پێنجوێنۍ هەستەرۍ بیێنیوە، جەختیچ کەرۊوە، هەڵوێستوو گەلی تاکە ڕاو ماڕای ئەرەگیران.
جە ئەرەیاوناێوەنە فەرماندەیی یەکینەکاو پارێزنای وەرکەوتوو کوردستانی (یەرەکە) باسش جە زیادتەربییەی هجووموو فڕۊکە بێفرۊکەوانەکاو دەوڵەتوو تورکی ئەرەگیری پەی سەروو ئاسۊسی و پێنجوێنۍ کەرڎەن و وستەنش ڕووە، کە بۊنە و ئا هجووماوە زەرەری فرە بە مێوەدەیما و باخاو خەڵکوو مەنتێقەکەی یاوان.
یەرەکە داواش وەنەو سەرجەموو چینەکا کەرڎێنە، کە ناڕەزایەتی وەراوەروو ئا هجووما بەروزا و واتش: ". بێگومان هەڵوێست و دژایەتیی گەلەکەیما بەتایبەت هەرێموو کوردستانینە تەنیا ڕاو مردنای و ماڕای ئەرەگیرانە".
دەقوو ئەرەیاوناکەی
پەی ڕای گردینی و گەلەکەیما!
هجووم و پەلامارە عاسمانییەکاو ئەڕتەش و دەوڵەتی فاشیستوو تورکیای پەی ئاسۊسی و پێنجوێنۍ زیاتەرۍ بیێنۍ و خەسارێوە فرەی ماددی بە دەگانشیناو ئا یاگا یاوان. پێسە ناوەندوو فەرمانداریی یەکینەکاو پارێزنای وەرکەوتوو کوردستانی(ی.ر.ک)ی، ئا هجووما بەتندی شەرمەزار کەرمۍ.
سەعات یەک پەی یەک و نیموو دمانیمەڕۊو ڕۊو ٢٤وو ئاگوست(تەباخ)ی، دامنەو کەشوو پەشتەو دەگاو ساڵیاواو پێنجوێنێنە هەرێموو کوردستانینە لاو فڕۊکێوە بێفڕۊکەوانوو دەوڵەتوو فاشیستوو تورکیەیۊ بۊردومان کریا. جە ئەنجاموو ئا بۊردومانینە مەرتەع و باخ و مێوەدەیمەو دەگانشینا و دارستانوو دەگایەکاو ساڵیاوا، کانی میرانی مەلیک و بناویان ئاویرشا وەر بییەنەنە و بەداخۊ خەسارێوە گەورە وەروو هاموەڵاتاو ئا دەگایا کەوتەن. بەداخۊ ئاویروو دارستانەکەی ئانە ماوەو یەرۍ ڕوان بەرڎەواما و بەرەو دەگاو ڕەنگینەی ئینا ڕاوە و هاموەخت خولیایۊ فڕۊکە سیخوڕییە بێفرۊکەوانەکاو ئەڕتەشوو فاشیستوو تورکیەی عاسمانوو پێنجوێنێنە بەرڎەواما و ئەگەروو هجوومی دووبارەی، هەڕەشێوەنە سەروو گیان و یانەو دەگانشینا.
پێسە ناوەندوو فەرمانداریی یەکینەکاو پارێزنای وەرکەوتوو کوردستانی (ی.ر.ک)ی، ئا هجوومە عاسمانییاو ئەڕتەشوو دەوڵەتوو فاشیستوو تورکیەی بەتندی شەرمەزارۍ کەرمۍ و جەخت کەرمێوە، کە ئامانجوو دەوڵەتی فاشیستوو ترکیەی چا هجووما، بەرڎەوامیداین بە جەنگی هەمەلایەنە دژوو گەلوو کوردی گردوو بەشەکاو کوردستانینە. بێگومان هەڵوێست و دژایەتیی گەلەکەیما بەتایبەت هەرێموو کوردستانینە تەنیا ڕاو مردنای و ماڕای ئەرەگیران. پا بۊنەوە داوا جە گردوو چینەکاو گەلەکەیما کەرمۍ بە بەروستەی ناڕەزایەتی مەیدانەکانە، پیلانگێڵنیی ئەرەگیرا پووچەڵ کەراوە. دڵنیێنمۍ کۊشیای گەلەکەیما و هێزەکاو جمیەری ڕزگاریوازوو گەلەکەیمان وەراوەر بە ئەرەگیرا میاوۊ سەرکەوتەی.
ناوەندوو یەکینەکاو پارێزنای وەرکەوتوو کوردستانی (ی.ر.ک)
س.ز
