هېزی شەوۍ دماو هجومەکەو دەوڵەتوو ئەرەگیری تورکی پۍ سەروو کەمپوو پەنابەرا مەخموری، ئەرەنیشتۍ کەمپەکەی بە گەورەو گولانۊ بەشێۋېوە جەماوەری حەتا وەردەموو نوقتۍ پۆلیسی ڕاپیمایشا کەرڎ. ئەرەنیشتۍ کەمپەکەی جەلایەن و هێزە عێراقییەکاوە جە نوقتەکېنە مردۍ، سەبارەڎ بە هجومەکەی شاندێوە کەمپەکەی چنی وەرپەرسا هێزە عێراقییەکا کوۍ بیېوە. دمابەدماو کۊبیەیۊکەی، وەرپەرسوو هێزە عێراقییەکا قسېش پۍ گەلی کەرڎۍ و هجومەکەو دەوڵەتوو تورکیش شەرمەزار کەرڎ و ۋاتش: "هجومېوەن پۍ سەروو خەڵکی مەڎەنی، ژەنا، زارۊڵا و گەنجا ئەنجامدریان، خراپتەرین کردەوۍ ئانېنە وەختۍ دەسدرێژی کریۊ سەروو دینی، هجوم کریۊ سەروو مزگیەکا، ئینۍ گرڎ دژوو ئایین و ئیسلامینۍ".

 شەوەی ۋیەرڎۍ جر کەمپوو پەنابەرا گەشمەرڎە ڕوستەم جودی (مەخمور)ینە سەعات ١٩:٠٥ دەیەقۍ فڕۆکېوە دەوڵەتوو تورکی ئەرەگیری مزگیېوە دلۍ کەمپەکەیش بۆردومان کەرڎ و جە ئاکامەنە ژەنێوە و دووۍ زارۊڵۍ زامڎارۍ بیۍ، حەرپاسە زارۊڵېوە فرۍ بە مەڵامەتوو بۆردومانەکەیوە تەرسۍ. ئەرەنیشتۍ کەمپەکەی دماو هجومەکەی دەسشا بە ڕاپیمایۍ جەماوەری کەرڎ.

ئەرەنیشتۍ کەمپەکەی بە گەورە و گولانۊ جە یاگۍ ڕووەداکەینە بەرەو بیناو ڕێکوزیاو خانەواڎەو گەشمەرڎا لووۍ، و چا بە شێۋېوە جەماوەری ڕاپیمایشا ئەنجامدا. جە ڕاپیماکەینە دروشمەکۍ "بژیۋۊ مدرامانوو مەخموری" و "مرۊ خیانەت"ی وچیېوە.  ڕاپیماکەی تا وەروودەم و نوقتۍ هێزە عێراقییەکا وەربەرەو کەمپەکەینە بەردەوام بۍ. هێزە عێراقییەکۍ ڕاشا نەڎا ئەرەنیشتۍ کەمپەکەی نوقتەکېرە ویەرا، شاندێوە جە خەڵکوو کەمپەکەی چنی وەرپەرسا هێزە عێراقییەکا قسېشا کەرڎە.

یاگەگیروو سەرۆک فیرقەو 14ی، سەعدون موحسین خەفاجی جە قسەکاشەنە یەرەیاوناش، ئاڎۍ بەمەڵامەتوو ئی هجومەیۊ فرە دڵگرانېنۍ و ۋاتش: ئی هجومەیە شەرمەزار کەرمۍ. ئی هجومە به مەڵامەتوو ئانەی جە دژوو خەڵکی مەڎەنی، ژەنا، زارۊڵا و گەنجا، خراپتەرین چېو ئانەن وەختۍ دەسدرێژی کریۊ سەروو دینی، هجوم کریۊ سەروو مزگیەکا. بەپاو ئانەی جە ۋێنەکانە دیەنما، بەمەڵامەتوو هجومەکەیۊ دلۍ مزگینە قورئان سۊتەن و کەلوپەلەکۍ دلېش تېکېشیێنۍ، ئینۍ گرڎ دژوو ئایین و ئیسلامینۍ. دەنگوو شمەما یاونان بەسەروو ۋېما و چنی وەرپەرسا بەغڎایچ قسېما کەردېنۍ. ئیسە کە ڕانە بېنا، تەلەفۆنێوەم جە بەغڎاوە پنەیاوا، کە ماچا ئا ڕووەدایما پنەیاوان کە جە کەمپەکەنە ڕووەشدان. سەبای شاندێوە جە وەرپەرسا حکومەتی جە بەغڎاوە سەردای کەمپەکەی کەرا. ئی هجومەی کە جە کەمپەکەنە ڕووەشدان نامرۆڤانەن و ئێمەیچ پېسە حکومەتوو عێراقی شەرمەزارش کەرمۍ. هیواڎارېنمۍ ئارامۍ بیدۍ، نمازمۍ حیچتا سەرەرە بۍ. گرڎوو داواکاریەکاتا پۍ وەزیری کیانمۍ جە بەغڎا. نوقتەکۍ ئێمە کە دەوروو کەمپەکەیرە هەنۍ، گرڎ پۍ پارېزناو شمە وکەمپەکەینۍ و ڕا مەڎەیمۍ حیچ زەرەرۍ بیاوۊ بە کەمپەکەی”.

دماو قسەکا وەرپەرسوو هێزە عێراقییەکا، ڕاپیماکەی بە دروشمەکا "مدرامان ژیۋاین''، ''بژیۋۊ سەرۆک ئاپۆ'' و ''مرۊ خیانەت'' دمایش پنە ئاما.