چنی گرڎو هجومەکا دەوڵەتو تورکی ئەرەگیری پەدەکە بە دەزگا هەواڵگری و ئەرەیاۋناکاشۊ ۋەڵۍ میتی و بە ئامانجو ڕەواتی دای پا هجوما، کەسە بە ئامانج گیریایەکا پېسە ئەنڎامی و ۋەرپەرسو پەکەکەی ئەرەیاۋنۊ.
جە تازەتەرین پەلامارەو فڕۊکە بۍ فڕۊکەوانەکا دەوڵەتو ئەرەگیری تورکینە نزیک بە پېنجوېنۍ ترۊمبېلېوە بە یەرۍ سەرنشینېوە کریا ئامانج، پېسە پیشەو هەمیشەیی ۋېش دەزگاو بەنامۍ دژەتیرۊری پەدەکەی ۋەڵۍ میتی و دەوڵەتو تورکی کۊت و سەرنشینەکېش پېسە ئەنڎامو ۋەرپەرسو پەکەکەی ئشناسۍ شۊنیشەرە یاۋنەریە ڕەسمی و سېبەرەکۍ پەدەکەی هەواڵەکەشا ۋەڵا کەرڎۊ.
ئارۊ و کەمتەر جە ٢٤ سەعاتا دماو ئا پەلامارە وەحشیانۍ دەوڵەتو تورکی بەرکۊت کە سەرنشینۍ ترۊمبېلەکەی ئەنڎامۍ خانەواڎېوەنۍ کە خەڵکو شارو دهۊکینۍ، کە کناچەکېشا جە ۋڵات و ئېرانینە خۊنکارەو زانشتگەی بیېنە و نیازشا بیەن جە مەرزو باشماخیۊ ڕەوانەو ئا ۋڵاتەیشە کەرا.
ئشناسنامەو ئا یەرە گەشمەرڎا پی جۊرەنە:
حەسەن ئەحمەڎ نۆزەت، ئەرەنیشتەو دهۊکی و کارمەنڎو کۊمپانیاو ئاسیاسېڵی جە بەشو هونەریی و بورجەکا بیەن چا پارېزگانە.
زیابە مستەفا، هامسەرەو حەسەن ئەحمەڎیی.
ڕیام حەسەن ئەحمەڎە، کناچېشا بیېنە.
حۊڵە وەردەوامەکۍ دامودەزگا هەواڵگری و یاۋنەریەکۍ پەدەکەی بە ئامانجو شارتەیۊ تاوانەکا دەوڵەتو تورکی و ڕەوایەتی دای پا تاوانو دەسدرېژیا، ئیجارە جە ماۋېوە کوڵەنە بە ئاشکرابیەو دروەکاش بی بە مەڵامەتو حەیا شیېوەتەرو ئا پارتیە و بەرکۊتەی میاچەمای ڕاسەقینەیش.
سەرەڕاو ئاشکرابیەو ئشناسنامەو گەشمەرڎەکا ئا هجومیە ، تا ئیسە پېسە گرڎو هجومەکا تەریش ئا دۊڵەتە کە چنەشەنە هاموڵاتیۍ مەڎەنیۍ هەرېمی کەرۊنە ئامانج، دامو دەزگا ڕسمیەکۍ حکومەتو هەرېمی بېدەنگۍ و بۍ هەڵۋېسېنۍ حیچ کاروەدایۍ و ناڕەزایېشا بەرنەبڕیەن
هـ . ش
