ئەنڎامەو کۆمیتەو ڕاوەبەری پەکەکەی هێلین ئومیتە ئەرەیاۋناش:"شەرتا ژەنی جە سیستەمی بڕیۊرە و بەشێوېوە جیا ۋېش بە ڕێکوستەی کەرۊ، ژەنی چنڎە سەربەخۆ بۊ، ئانڎە زیاتەر ۋېش، ڕەگەزوو ۋېش مشناسۊ و بۊنە بە خۊتان ئیراڎە."
ئەنڎامەو کۆمیتەو ڕاوەبەری پەکەکەی هێلین ئومیتە، بەشڎارەو'بەرنامەو تایبەت'ی مێدیا هەبەری بۍ و بۆنەو ٢٥و تشرینوو دووەمی ڕۊو جەهانی تنووتیژی دژوو ژەنا قسېش کەرڎۍ.
جە سەرەتاو قسەکاشەنە، هێلین ئومیتە سڵامش پۍ ڕابەروو گەلوو کوردی عەبدوڵا ئۆجالانی کیاست کە دژوو پیلانگێڵنی و گۊسەگیری ئیمراڵی مدرامانۍ بێ وێنە بەرۊ ڕاوە.
ئومیتە واتش:"مشۊم مدرامانوو ئیمراڵی و کردەوەکۍ ئاگەی پېسە ناوەنڎوو ڕووەدای و پێشئاماکا هۊرسەنگنایش پۍ کریۊ، پۊکەی پەنەوازەن ڕاسی ئیمراڵی و ڕاسی ڕابەروو گەلوو کوردی بەردەوام ڕۊژەڤەنە با."
هێلین ئومیتە حەرپاسە ٤٥ ساڵەو ئەرەمەرزناو پەکەکەیش جە ئەرەمەرزنەروو پەکەکەی، ڕابەر ئۆجالانی، پیرۆز کەرڎ.
ئومیتە واتش:"گرنگا دژوو ناوەنڎوو قڕکەرڎەی ئیمراڵی، دژوو سیستەموو قڕکەرڎەی کۊشیای کەرمۍ. ئینە پەیوەندیش بە بەرزکەرڎەیۊ پیمەروو ئازاڎییوە هەن. سەروو ئا ئەساسیە، داوا جە گرڎ لېوە کەروو، جە ئاینڎەنە جە مانگەو پارتینە سیستموو سەروو ڕابەر ئاپۆی، ڕابەروو ئازاڎیی، ماڕانە."
تنووتیژی سەروو ژەنا ئینە بناغەو شارستانیەتینە
هێلین ئومیتە، بۆنەو ٢٥و تشرینوو دووەمیۊ، ڕۊو ئەرەکۊشای دژوو تنووتیژی سەروو ژەنا، وەڵۍ گرڎ چېوېنە داواو کۊشیایۍ ڕێکوستەیش جە گرڎوو ژەنا کەرڎ و واتش:"ئی جەهانە کە ئینایمېش چنە فاڕیان پۍ جەهانێوە پاسەی کە بۊنەو دەسەڵاڎداری پیاسالارییوە ژیۋای چنەشەنە سەختتەر بیەن. کریۊ واچمۍ تنووتیژی جە گرڎوو بوارەکا ژیۋاینە هەن. بەڵام جە ناوەندوو ئینەینە تنوتیژی دژوو ژەنان. شیکاری تاریخی و کۆمەڵایەتی هەمیشە بەرۊماوە پۍ سەرەتاو تاریخی. ئێمە سەرنج وزمۍ سەروو ئانەی کە بەبێ شارستانییەت، دەوڵەت چنی دەسەڵاتەکېش بنیاڎ نیېنۍ. ئینیشا ۋینمۍ؛ شارستانیەت پەشتیش بە دووۍ چېوا بەستەن و پی شێوە بنیاڎ نریان. بە باڵادەسی سەروو ژەنارە بنیاڎ نریان و ئینەیچ سەروو دروا و تنووتیژی. دژوو ژەنا ئینا سەرەتاو شارستانیەتینە. بەبێ تنووتیژی دژوو ژەنا شارستانی،دەوڵەتپارێزی سیستەموو دەسەڵاتداری بنیاڎ مەنریۊ، ۋەروو ئانەیچ ڕەگەزپەرەسی کۆمەڵایەتیچ جە قسەکانە بیەیش هەن. قسۍ'مەبۊ سەرە جەۋەران ۋەروو ژەنېنە وزیرە، وەختۍ سەرەش بەرز کەرڎۊ، پەنەوازەن دەیش ۋنە'، ۋەروو ئانەی نەکا ژەنی بۊ بە خۊتانوو ۋېش، بەردەوام دریۊشا ۋنە، بەردەوام بێ ڕێزیشا پنەکریۊ."
هێلین ئومیتە ئاماژەش پانەی دا کە جەستە و بیەو ژەنۍ کە جە سەرەتاو مرۆڤایەتینە پېسە پیرۆزی تەماشەکریۍ، فاڕیان پۍ چېوۍ پاسەی کە مشۊم سووک تەماشە کریۆ، ئاماژەش پانەیچ کەرڎ کە جە سەرەتاو تنووتیژییوە ڕاسیېوە پا جۊرە ئایدیۆلۆژیک، ڕەگەز پەرەسانە بیەیش بیەن.
هێلین ئومیتە واتش کە ژەناو گرڎوو جەهانی و بەتایبەت ۋەرکەوتوو دلېڕاسەی ئینۍ دلېڕاسەو جەنگېوە جدینە و جە درێژەو قسەکاشەنە ئەرەیاۋناش:"پۊکەی جە ٢٥ و تشرینوو دووەمینە پەنەوازەن تنووتیژی دژوو ژەنا، حەرپاسە کۊشیای دژوو تنووتیژی زیاتەر ڕۆژەڤەنە بۆ. ئینە مەبۊ تەنیا جە یەک ڕۊنە کریۊ، بەڕاسی پەنەوازما بە کۊشیایۍ ڕێکوستە کریاین. ژەنا پەنەوازشا بە کۆبیەیۊین و مشۊم دەنگشا بەرز کەراوە.
سەرهۊردای دژوو سیستموو موڵکایەتی مەرجێوەن پۍ ژیۋایۍ پەڕ جە شکۆمەندی ژەنۍ. گرنگی بڎەیدۍ بە؛ ژەنێوە کە پېسە ۋېش نییەنە. بەردەوام هینەو بڕېوەنە. یان هینەو مێردەکەیشەنە، یان تاتەیشەنە، یان هینەو هامڕاو پیاکەیشەنە. بەردەوام هینەو پیېوەنە. سیستموو موڵکایەتی پی جۊرەنە. ئیسە حزبەکېچ هەمان چېو کەرا. مەبەستم ئانەن ژەنی جە ئاکەپەنە بەردەوام پی جۊرەنە. واتە ژەنی پۍ ۋېش نییەنە. ئی دلېنەبەرڎەیە پۍ ۋېش گەورەتەرین سەرچەمەو تنووتیژییا.
ژەنی مشۊم هینەو ۋېش بۊ. شەرەفی گەورە ئانەن ژەنی بۊ بە هینەو ۋېش. مشۊم ۋېما بیمۍ. ئێمەی ژەنا پەنەوازەن خۊتانکەرڎەی جە هەنترینی کەرمۍ. جا تاتەما بۊ، کەسێوە کە فرە وەشما مسیۊ، یان پیېوە بۆ، مەبۊ سەبارەڎ بە ژەنۍ قەراردەرۍ با. ژەنی مشۊم ۋېشا قەرار بڎا. ڕاو ئی هەرمانۍ جیابیەیۊین جە سیستمی پیاسالاریی.
شەرتا ژەنا ۋېشا جە سیستەمی بڕارە و بە شێوېوەتەر ۋېشا ڕێکوستەی کەرا
شەرتا ژەنی تا متاوۆ ۋېش جە سیستەمی بڕۊرە و بە شێوېوە تەر ۋېش ڕێکوستەی کەرۆ. ژەنی چنڎە زیاتەر خۆسەرە بۊ، زیاتەر سەروو پەیا ۋېشۊ مرڎۊ، زیاتەر ۋېش مشناسۊ و ڕەگەزوو ۋېش مشناسۊ و بۊنە بە خۊتان ئیراڎە و ئیحترامش بۊ. وەشەسیای و دڵسۆزی ڕاسەقینەی سەروو ئی ئەساسیە منیۊرە. پۊکەی ڕابەر ئاپۆ واتش' ئاشتی سەرچەمەو وەشەسیاییا'. ئینە تەنیا کەلیمېوە نییەنە کە جە بواری ئەدەبینە وچیۍ بۆ. بەمەڵامەتوو ئی هوشیارییەو ئازاڎیی، فەلسەفەو ئازاڎیی، جمیەروو ژەناو پەکەکەی جە بواری سروشتیوە بیەن بە سەرچەمەو وەسەسیایی. بەبێ ئینەی سەرهۊردای دژوو تنووتیژی مەکریۊ.
ئێمە باسوو ڕاسیېوە کەرمۍ کە پېسە دڕنڎېوەن. شارستانیەتوو ئیسەی جە گرڎ ڕووېوە پیایانەن. جە گرڎ یاگېنە سیاسەت بیەن بە هەرمانەو پیای. سوپانە حاکمېنۍ. ئاڎۍ قسۍ کەرا، دیاری کەرا. بارگرانی سیستموو سەرمایەداری ستەمکاری، بارگرانی جەنگی گرڎ وزیۊ سەرووشانەو ژەنا. ئایا ژەنی ئینەی پېسە چارەنوویسوو ۋېش ۋینۆ؟ یان پۍ دیاری کەرڎەی ڕێبازوو ۋېش کۊبۊوە و ۋېش بە ڕێکوستەی کەرۊ و کۊشیایش پۍ بەرۊڕاوە؟ ئێمە جە بنەڕەتەنە ڕاما پۍ ئی ڕێبازەیە وەش کەرڎەن. واتە پېسە پاژکی پۍ ژەناو جەهانی ڕاما نیانەرە، بیەیمۍ بە نموونە و مۆدێل. سەرەتا ژەناو هەرێمەکەی داوا جە گرڎوو ژەنا کەرمۍ ئی نموونەیە، ئی سەرمەشقایەتیە عال بشناسا، بە شێوېوە دروس بەشڎارېش با و دژوو سیستموو دەسەڵاڎداری پیای کۊشیای کەرا."
