جە ئاکامو سیاسەتە ۋۍ سەپناکا خاندەواڎەو بارزانینە، تا مۍ تەرسەکۍ سەرو قەوارەو هەرېمی زیاتەرۍ با، ڕۊنامېوە بەریتانی ئاماژە پانەی کەرۊ، وەرموو سەربەخۊ بیەو کورڎی فرە دورا جە بەدیئامای و ئەگەرو هەرسئارڎەی قەوارەو هەرېمی ئینا ئارانە.
جە چن ساڵی ۋیەرڎەنە بە دیاری کریایی جە سەرەتاو کیاستەی نەوتەو هەرېمی و ڕېککۊەتە ٥٠ ساڵیەکەنە چنی دەوڵەتو ترکی ئەرەگیری، ئاگاڎیەکۍ پا جۊرە بېنۍ پەنەوازەن حکومەتو هەرېمی چنی حکوموتو عېراقی ڕېک گنۊ بەشېۋېوە شەفاف و یاسایی نەوتە کیانۊ بەرۊ، بەڵام خانەواڎەو بارزانی گرڎوو ئاگاڎییەکاشا پەشتگۊش وستۍ.
چا چوارچېوەنە، دماو قەرارو داڎگای میانجیکەری جە پاریس و دماتەریچ هۊرشېونایۊ پەڕلەمانو هەرېمی جە لایەنو داڎگای فیدراڵی عېراقی-ۊ، هەرېمو کورڎسانی ڕوبەڕوو قەیرانېوە قورسی بیەنۊ و تەنانەڎ تەرسەو هۊرشېونایۊ قەوارەو هەرېمی بیەن بە ڕۊژەڤ و ڕۊنامە جەهانیەکا.
جەبارەو ئاژەی سیاسی هەرېمو کورڎسانی-وە، ڕۊنامەی ئیکۊنۊمیستی بەریتانی گوزارشتېوەش بە نامونیشانو" وەرمو سەربەخۊبیەو کورڎی جە ئیسەنە جە گرڎ وەختۍ زیاتەر دورا جە بەدیئامای"، سەرو هەرېمو کورڎسانی ۋەڵا کەرڎەنۊ و ماچۊ، وەرمو سەربەخۊبیەو کورڎی فرە دورا جە بەدیئامایۊ و ئەگەرش هەن قەوارەو هەرېموو کورڎسانی شکس بارۊ.
هاموەخت جە نامونیشانی لاوەکیچەنە نۋیستەنش، جە وەختېنە کورڎەکۍ جەنگشانە، حکومەتو عېراقی خجڵ و کۊنترۊڵکەرڎەی دەسەڵاتیا، گوزارشتەکۍ باسو ئانەی کەرۊ کە پۍ ماوەو ٣٠ ساڵا هەرېمو کورڎسانی جە گەشەئەسایۍ ۋەردەوامەنە بۍ، بەڵام جە دماو ڕیفراندۊمەکەو ٢٠١٧ یۊ شش ساڵېن ۋەرموو سەربەخۊبیەی پوکیانۊ و ئیسەیچ دەسەڵاڎ دارۍ عېراقی خەریک و دلېنەبەرڎەو وەرموو سەربەخۊ بیەو کورڎسانینۍ.
حەرپاسە باس چانەیچ کریان کە ۋەرپەرسا ئیسەو بەغڎای بە بۍ بایەخو کەم تەماشەو ۋېڕاوەبەری کورڎسانی کەرا، دماو ٣٠ ساڵا جە ۋېڕاوەبەری ئابوری و سیاسەتەکېشا، تا ڕادېوە فرە بەرەو ئانەی ملۊ گېڵۊوە چېرو دەسو دەسەڵاتی ناۋەنڎیی، دیپلۊماتېوە ۋەرنیشتی کە چەمڎاری پەرەئەساکا بەغڎای کەرۊ، ماچۊ،''تەرسەو هەرەسئارڎەو قەوارەو هەرېموو کوڎسانی ئینا ئارانە''.
چا چوارچېوەنە، جە پەیمانگاو ۋەرکەوتوو میامینی/ وینسرۊپ ڕۊجەرز جە گوزارشتېوەنە سەبارەڎ بە ناکۊکیەکا پەدەکەی و یەنەکەی و چاکسازی دلۍ ڕیزەکا پېشمەرگەینە ۋاتش،''مەسڵەحەتی حیزبی سەرکرڎۍ حیزبەکا تەمام کاریگەریش سەرو چاکسازیەکا وەزارەتوو پېشمەرگەی نیانەرە''.
هاموەخت ئا ڕۊنامەنۋیس و شرۊڤەکارە ئەمریکیە جە گوزارشتەکېشەنە ماچۊ،'' سالۍ سەرو یاداشتنامەو بەینوو وەزارەتو ۋەرگیری ئەمریکای و پېشمەرگەیرە ۋیەرڎەن و هەنگامەکۍ یۊوستەیۊ هېزو پېشمەرگەی هەڵای نەنریېنۍ و کریۊ ئینەیچ کاریگەری خراپ سەرو پەیۋەنڎیەسیاسی و ئابوریەکا بەینو هەرېمی و هېزەکا هامپەیمانانە وەش کەرۊ''.
چنی ئامای مانگەو ئەیلولی ساڵۍ سەرو یاداشتنامەو بەینو وەزارەتو ۋەرگیری ئەمریکای و وەزارەتو پېشمەرگەیرە ۋیەرۊ و بەپاو قسۍ چن سەرچەمېوە ئاگاڎاری ئاژەکە، سەرەڕاو پەکوستەیش پۍ ماوەو ٣ ساڵا ۋەرپەرسۍ هەرېمی پابەنڎۍ نیەنۍ بە ئەنجامدای چاکسازیەکا دلۍ هېزەکا پېشمەرگەی.
جە ئیسەنە؛ هەرېموو کورڎسانی تامۍ دەسەڵاتەکاش جە دەس مڎۊ، نەک تەنیا جە تەسلیمکەرڎەی نەوت و گازی و خاڵە سنوریەکانە، جە ئاستو مەنتیقە کېشە سەرەکانە پەدەکە دەنگ و کورڎیش شپرز کەرڎەن، پۍ هۊرچنیەو ئاېنڎەو ئەنجومەنو پارېزگاکا عېراقی، ئاژەو کورڎی پاش وستەن مەرحەلېوە جیاوازۊ، حەشدی کورڎی جە خورماتونە وەشکریان پۍ دایۋنەو پېگەو سینەو کورڎی جە مەنتیقە کېشە جە سەرەکانە، ئینەیچ بەمەڵامەتو سیاسەتە ۋېسەپناکاو پەدەکەین.
هـ.ش
