ژمارێوە چالاکۍ ژەنا جە ئێرانەنە سزاو ٦٠ ساڵا زینڎانیشا سەرەرە سەپیا
دادگاو دەسپنەکەردەیۆ(تێهەڵچونەوە) پارێزگاو گیلانی جە سەرنیشتوو ئێرانی سزاو زیاتەر جە ٦٠ ساڵا زینڎانیش سەروو ١١ چالاکا بواروو مافەکا ژەنارە سەپنا.
بەپاو هەواڵێوە میدیاکاو ئێرانی، دادگاو دەسپنەکەردەیۆ رەشتی سزای سەپیاش سەروو ١١ چالاکا مافەکا ژەنارە پېسە ۋێش و بە بێ هیج فاڕیایۍ پەسەنڎ کەرد.
ئا ١١ چالاکۍ جە ١٦ و ئابو ٢٠٢٣ ێنە جە ئاکاموو هۊرکوای هێزەئەمنییەکانە پەی سەروو یانەکاشا جە شارەکاو رەشت، بەندەر ئەنزەلی، لاهیجان و فومەنینە گیریێنۍ و دماو شش مانگا جە گێرتەیشا بە نیایرەی بارمتەی قورسی بە شێوێوە وەختی ئازاڎۍ کریێبێنۍ.
جە ئەرەنیشتەو دادگاینە زوهرە دادڕەسە بە تۆمەتەو پێکئاوردەو گروپی بە ئامانجوو تێکدای ئاسایشی نیشتمانی سزاو ٦ ساڵا و یەک ڕۆ زینڎانی و بە تۆمەتەو "کۆبیەیۆ و پیلانگێڵنی" سزاو ٣ ساڵا و شش مانگا و یەک ڕۆ زینڎانی واتە بە کۆو گرڎینی سزاو ٩ ساڵا و شش مانگا و ٢ ڕووا زینڎانیش سەرەرە سەپیان.
حەریۆ جە نگین رەزاییۍ، مەتین یەزدانیۍ، ئازادە چاوەشیانۍ، فروغ سەمیع نەژادۍ، سارا جیهانیۍ، زەهرا دادڕەسۍ، یاسمین حەشدەریۍ و شیوا شاهپەسندۍ بە تۆمەتەو "کۆبیەیۆ و پیلانگێڵنی" سزاو ٣ ساڵا و شش مانگا و یەک ڕۆ زینڎانی و بە تۆمەتەو ئەندامبیەی جە گروپینە سزاو ٢ ساڵا و حۆت مانگا و١٦ ڕووا (واتە حەریۆ چاڎیشا بە کۆو گرڎینی سزاو شش ساڵا و یەک مانگۍ و ١٧ ڕووا) زینڎانیشا سەرەرە سەپیان.
دووۍ چا گیریایایچە بە نامەکاو جیلوە جەواهریۍ و هومەن تاهیریۍ بە تۆمەتەو بانگەشەی دژوو دەسەڵاتی حەریۆشا سزاو ساڵێوە زینڎانیشا پەی بڕیانۆ.
جە دماو دەسپنەکەردەو سەرهۊردای ژەنی، ژیۋای، ئازاڎیی هێزە ئەمنییەکاو ئێرانی فشارەکێشا پەی سەروو چالاکا ژەنۍ چڕتەر کەردەنۆ و دەیان ژەنە چالاکۍ گیریێنۍ و ڕوانەو زینڎانی کریێنۍ.
