فەرەنسانە جە ١ نۆوەمبەرینە ژمارەو گیریایا جە کۆو گردی زینانەکانە یاوان بە سەڎەنە ١٢٨.٥ و جە ١٣ زینانانە ئا رێژە سەڎەنە ٢٠٠ش ۋېیەرنان، واتە دووێ ئاڼنە زیاتەر جە تواناو ڕاگێرتەیشا، زینانیێشا ئینێ چنە.
بە پاو پەلیانەو وەزارەتو دادو فەرەنسای جە تۆڕەکۆمەڵایەتیەکانە، زینانەکانە کە تواناو ٦٢ هەزارا و ٣٥٧ کەسێشا هەن، جە ١و نۆوەمبەری ژمارەشا پەی ٨٠ هەزارا و ١٣٠ کەسا بەرزبییەنۆ.
ئەرەیاوناش، جە مانگەو نۆوەمبەرینە بە گردی شلۆقی دلێ زینانەکا سەڎەنە ١٢٨.٥ بییەن، جە ١٣ زینانانە ئا رێژە سەڎەنە ٢٠٠ ۋیېەرنان. بەمەڵامەتو ئا شلۆقیۆ، یاگێ وتەی پەی نزیکەو ٣ هەزارا و ٩٦٢ زینانیا نییەنە و ناچارێنێ سەرو زەمینیۆ بوسا.
بەشۍ فرەو ئا شلۊقیە دلێ زینانەکاو فەرەنسای پەی بییەو ژمارێوە فرەو گیریایا گێڵۆوە کە چەمەڕاو دادگایی کەردەینێ، هەرپاسە هەزاران زینانیێ تەرێ سزای ماوەکوڵشا هەن زینانەکانە.
جە مانگەو نۆوەمبەرینە ژمارەو گیریایا یاوان ٩٦ هەزارێ و ٥٦٩ کەسا، چا ژمارەیە ١٦ هەزارێ و ٤٣٩ شا نەگیریێنێ، بەڵکم جە ڕاو بازنەی ئەلیکترۆنیۆ جە یانەکاشانە دەسبەسەرێنۍ.
بە پاو ئا لوای شونیرەیرە کۆنسەو ئەوروپای جە مانگەو حوزەیرانینە ئەنجامەکەش وەڵاکریانۆ، چڕی و فرەیی گیریایا دلێ زینانەکا فەرەنساینە ئینا بەرزتەرین ئاستەنە، جە روو خراپی دۆخو زینانەکاوە، فەرەنسا جە دماو قوبرسی و رۆمانیای بە پلەو یەرەمی مێ.
