براوێ جەڵاتوو نۆبڵوو ئاشتی و پارێزنەرەو  مافەکاو ئینسانی و محەمەدیە ئەرەیاوناش داواکاری گردینوو زیندانوو ئەوینی داواش کەردێنە نێرگزە و ٤ ژەنە زیندانیێ تەرێ ئیفادە بدانە، وەلێ ژەنە زیندانییەکێ ڕەتشا کەردەنۆ.

بە قسێ نێرگز محەمەدیێ، وێش و وریشە مورادییە و پەخشان عەزیزییە و مەحبوبە ڕەزاییە و پەریوش موسلمییە، کە ئینێ زیندانوو ئەوینینە، ئشیا ڕۆو دووەشەممەی ئیفادەشا دێ بە داواکاری گردینوو ئەردەبیلی.

ئەوەخوای کریاوە، ئی ٥ زیندانییە سیاسیێ و چالاکێ مافوو ئینسانی، پەی شەرمەزارکەردەی قەراروو قەنارەدای ئیفادەشا ڕەت کەردەنۆ.

دماو ئانەیە زیندانیی کوردی ڕەزا ڕەسایی ٦ و ئابوو ٢٠٢٤ دریا قەنارە، زیندانییە ژەنەکاو زیندانوو ئەوینی، قەرارەکەو دەوڵەتوو ئێرانیشا شەرمەزار کەرد. پاسەوانەکێ هجوومشا کەرد سەروو زیندانییە ژەنەکا و چند زیندانیێوی بریندارێ بیێ.