جانسو ئۆزدەمیر ئەندامى پەرلەمانى فیدراڵى ویلایەتى هامبورگی ئەڵمانیا، هێرشى ئەمدواییەى چەتە نەژادپەرستەکانى تورک بۆ سەر کوردان لە ئەڵمانیا، کە سەرنجی زۆرى خراوەتە سەر، بردە پەرلەمان و لەبارەی ئەو هێرشانەوە قسەى کرد.

جانسو ئۆزەدەمیر، کە هاوکات هاوسەرۆکى پەرلەمانى ویلایەتى هامبورگە لەبارەى کارەکانى فیدراسیۆنى کۆمەڵە تورک و دیموکراتیک و ئیدەئالیستەکان (ADUTDF) و ڕێکخستنێک بە ناوی کۆمەڵەى فورقان و حیزبى تەحریرەوە پرۆژە پرسیارێکى ئامادە کرد.

لە پرۆژ پرسیارەکەى ئۆزدەمیردا داوا کراوە، حکومەتى ویلایەتى هامبورگ وەڵامى پرسیارەکان بداتەوە و هەروەها پرسیاری ئەوەشیکردووە، کە یەکەى ئەمنى و ئاسایشى ئەڵمانیا لە دژى ئەو گروپانە و کارەکانیان چیى کردووە و چۆن لێیان نزیک بووەتەوە.

ئۆزدەمیر لە پرسیارەکانیدا لەبارەى (ADUTDF) باسى ئەوەیکردووە، کە ئەو گروپە ٧ هەزار ئەندامى هەیە و گەورەترین ڕێکخراوى نەتەوەپەرستى تورکە لە ئەڵمانیا.

ئۆزدەمیر پرسیاری ئەوەیکردووە، یەکەى ئەمنی و ئاسایشى ئەڵمانیا لە دژى (ADUTDF) هەڵوێستى چۆنە، لایەنگرانیان لە هامبورگ لە ساڵى ٢٠١٥ەوە چەند زیاد، یان کەمیکردووە، پەیوەندیى (ADÛTDF) لەگەڵ لۆبیى رژێمى ئاکەپە – مەهەپە و ئەردۆغاندا چییە و چۆنە. هەروەها لەبارەى تورکۆس هامبورگ (Turkos Hambûrg) و توران. ئی. ڤی. هامبورگ (Turan.e.V.Hamburg) دا لە راپۆرتی هەواڵگریدا بە "نەتەوەپەرستى تورک" پێناسەکراون، چ زانیارییەک لەبەردەستى بەڕێوەبەرانى هامبورگدایە.

چى لەسەر کۆمەڵەى فورقان دەزانرێت

ئۆزدەمیر لەسەر کۆمەڵەیەک بە ناوى فورقان و حیزى تەحریرەوە پرسیارى ئەوەیکردووە، لەبارەى ئەو کۆمەلەیەوە چ زانیارییەک لە دەستى یەکەى ئاسایشدایە. ئامانجى ئەو کۆمەڵەیە چییە و بۆ ئامانجەکەیان چ ڕێگا و ڕێبازێک بەکار دەهێنن. لە پشت کۆمەڵەى فورقانەوە تۆڕێکى نێودەوڵەتى یان دەوڵەتێک هەیە، یان نا. حکومەتى ویلایەتى هامبورگ و یەکەى ئاسایش بۆ پێشگرتن لە کارى ئەو کۆمەڵەیە چییان کردووە.

هەروەها ئۆزدەمیر لەبارەى حیزبی تەحریرەوە، هەمان ئەو پرسیارانەى کردووە، کە لەبارەى کۆمەڵەى فورقانەوە لە پرۆژە پرسیارەکەیدا خستبوونییەڕوو.