چالاکییەکانی ئێشکگری دادپەروەری بۆ ئازادی جەستەیی ڕێبەری گەلی کورد عەبدوڵا ئۆجالان لە شارەکانی وان و مێرسین و مێردین و ئامەد و ئێلح و ئەزمیر بەردەوام بوو.

لە چالاکییەکانی ئەمڕۆشدا، سەردانی لایەن و پارت و کەسێتییەکان بەردەوام بوو، لە چالاکییەکاندا کۆمەڵکوژی هەڵەبجە شەرمەزارکرا، درووشمەکانی "ژن، ژیان، ئازادی" و "بێ سەرۆک ژیان نابێ" و "بژی بەرخۆدانی زیندانەکان" بەرزکرایەوە. چالاکوانان و سەردانیکەران داوای هەڵگرتنی گۆشەگیری و ئازادی جەستەیی سەر ڕێبەری گەلی کورد عەبدوڵا ئۆجالانیان کرد.

لە چالاکیەکەی وان، یەک لە سەردانکەران، ئاسڵیهان تیمور گوتی: "داوا دەکەین گۆشەگیری سەر هەموو زیندانیانی سیاسی و بەتایبەت بەڕێز عەبدوڵا ئۆجالان کۆتایی بێت. تا ئەم گۆشەگیریە کۆتایی نەیەت، ئێشکگری بەردەوامە. ئێمەی دایکان دەخوازین لەسەر مێزێک دانیشن و دانوستان بکەن. سبەی بە جلوبەرگی نەتەوەییمانەوە لە گۆڕەپانی نەورۆز دەنگمان هەڵدەبڕین".

لە چالاکییەکەی مێردین پەرلەمانتاری پێشووی هەدەپە گوڵسەر یەڵدرم ڕایگەیاند زوڵم لە گەلی کورد و مافەکانی گەلی کورد و ژیانی گەلی کورد هەیە، بۆیە گۆشەگیری لەسەر ڕێبەری گەلی کورد عەبدوڵا ئۆجالان و فشارەکان لە زیندان و دانانی قەیومەکان بەردەوامە، ئەمەش ئەنجامی زیهنیەتی قڕکەر و نکۆڵیکار و پاکتاوکەرە، گوتی: "ئێشکگری دایکان بەشێکی گرنگە لە تێکۆشانی مەزن بۆ ئازادی ڕێبەرێتی و چارەسەری پرسی کورد. لە سەدەی ٢١ کورد ئازادی بەدەست دەهێنێت. ئازادی ڕێبەرەکەی بەدەست دەهێنێت، بە چارەسەری دیموکراتیک ژیانێکی نوێ دادەمەزرێنێت".