چالاکیی "ئێشکگریی ئازادی" لەلایەن دەستپێشخەریی ئازادی بۆ عەبدوڵا ئۆجالان لە ٢٥ی حوزەیرانی ٢٠١٢ لە شاری ستراسبۆرگی فەرەنسا بۆ ئازادیی ڕێبەری گەلی کورد عەبدوڵا ئۆجالان دەستیپێکرد و ئێستا چالاکییەکە لە هەفتەی ٤٩٨هەمین دایە.

چالاکییەکە هەموو هەفتەیە لەلایەن دەستەیەکی نوێی لە کوردان و دۆستەکانیانەوە لە ئەوروپا بەڕێوەدەچێت. ئێشکگرانی ئەم هەفتەیەش چالاکوانانی بزووتنەوەی گەنجانی شۆڕشگێڕن.

دەستە نوێکەى ئەم هەفتەیە پێکهاتوون لە سەرحەد دۆغان و فرات بۆتان و محەمەد یڵماز.

سەرحەد دۆغان بەناوی دەستەکەوە ڕایگەیاند، هاوکات لەگەڵ ئامانجمان بۆ ئازادکردنی ڕێبەری گەلی کورد عەبدوڵا ئۆجالان، دەشمانەوێت تاوانەکانی دەوڵەتی تورک لە دژی گەلی کورد ریسوا و ئیدانە بکەین.

سەرحەد دۆغان ڕایگەیاند، بێدەنگیی دەوڵەتانی ئەوروپا بەرامبەر ئەو تاوانە قبوڵ ناکەن و داوای لە گەلی کورد لە ئەوروپا کرد، کە هەڵوێست وەربگرن و پشتیوانی لە چالاکییەکە بکەن.

چالاکییەکە ماوەی ١٠ ساڵە لە گۆڕەپانی بەردەم (پەرلەمانی ئەوروپا، ئەنجومەنی ئەوروپا، سی پی تی و دادگای مافی مرۆڤی ئەوروپا) بەڕێوەدەچێت. چالاکییەکە هەموو ٧ رۆژەکەى هەفتە لە کاتژمێر ٠٧:٣٠ تاوەکو ١٦:٣٠ بەڕێوەدەچێت.

لە کاتی چالاکیی ئێشکگریدا، نامیلکە بە زمانە جیاوازەکان لەسەر ژیان، پارادایمی ڕێبەری گەلی کورد عەبدوڵا ئۆجالان، پیلانگێڕیی نێونەتەوەیی و سیستمی ئەشکەنجەی ئیمرالی دابەش دەکرێت و ئەوروپییەکان لە خواستەکان و پێشێلکارییەکان ئاگادار دەکرێنەوە.

ژ.ت