'ئێشکگریی ئازادی' لەلایەن دەستپێشخەریی 'ئازادی بۆ ئۆجالان' لە لە ٢٥ی حوزەیرانی ٢٠١٢دا بۆ ئازادیی جەستەیی ڕێبەری گەلی کورد عەبدوڵا ئۆجالان لە شاری ستراسبۆرگی فەرەنسا دەستیپێکردووە و ئێستا لە هەفتەی ٤٩٩هەمیندایە.

چالاکیی "ئێشگریی ئازادی" هەموو هەفتەیەک لەلایەن کۆمەڵێک کوردی جیاوازەوە لە ئەوروپا لەگەڵ دۆستەکانیان بەڕێوەدەچێت، ئەم هەفتەیە ئێشکگرییەکە لەلایەن گروپێک لە نەرویجەوە بەڕێوەدەچێت.

ئیسماعیل سەلام، شوان کەرکوکی و ئاسۆ فەقێ بە ناوی کەجەدەکە – ئەوروپا باشوور (KCDK-E Başûr)ەوە چالاکیی ئێشکگریی ئازادیی ئەم هەفتەیە لە ستراسبۆرگ بۆ ئازادیی جەستەیی عەبدوڵا ئۆجالان رێبەری گەلی کورد بەڕێوەدەبەن.

ئیسماعیل سەلام بە ناوی گروپەکەوە قسەیکرد و وتی: "ئەو ناوچەیە، کە ئێمە لێوەی هاتووین ساردە، بەڵام کاتێک ئێمە بۆ چالاکیی ئێشکگریی ئازادی و بۆ ئازادیی ڕێبەرەکەمان هەنگاومان نا، دڵمان گەرم بوو".

ئیسماعیل سەلام وتی: ئێمە لە دووریی ١٥٠٠ کیلۆمەترەوە هاتووین، چونکە ئەم ئێشکگرییە ئەرکێکی شەرافەتمەندانەیە."

ئیسماعیل سەلام ئاماژەی بەوەکرد، بۆ ئازادکردنی ڕێبەری گەلی کورد عەبدوڵا ئۆجالان و ئازادیی کوردستان یەکێتیی نەتەوەیی مەرجێکە و وتی، بە چالاکییەک، کە گەلی کورد ١٠ ساڵە بە بڕیارەوە بەڕێوەدەبات، ئیرادەی دامەزراندنی کوردستانێکی ئازاد دیاری دەکرێت.

ئیسماعیل سەلام وتیشی: "بانگەوازمان بۆ دامەزراوە ئەوروپییەکان هەیە. کورد دەستبەرداری رێبەرەکەى و کوردستان نابێت. ئێمە بۆ مافە بنەڕەتیەکانمان تێدەکۆشین".

ئیسماعیل سەلام ئەوەشی وت: "نابێت هیچ کەسێک هاوکاری و هاوبەشی لە تاوانەکانی تورکیا دا بکات" و داوای لە دامەزراوە ئەوروپییەکان کرد، ئەرکەکانیان جێبەجێ بکەن و بۆ کۆتاییهێنان بە گۆشەگیریی سەر ڕێبەری گەلی کورد عەبدوڵا ئۆجالان و بۆ ئازادیی ئۆجالان هەنگاو بنێنن.

ژ.ت