بزووتنەوەی ژنانی کورد لە ئەوروپا، ناڤ بەل (NAV-BEL) و دەم – نەد (DEM-NED) بڕیاریان دا تاوەکو ٣٠ی حوزەیران هەموو سێشەممە و پێنجشەممەیەک لە بەردەم بینای ڕێکخراوی قەدەغەکردنی چەکی کیمیایی (ئۆ پی سی دەبلیو / OPCW) چالاکی ئەنجام بدەن و لەو چوارچێوەیەدا دوێنێ یەکەم چالاکییان ئەنجامدا.

چالاکییەکە لەلایەن کوردانی ناوچەی بێنلوکس بەڕێوەدەبرێت، کە هۆڵەندا و بەلجیکا و لوکسەمبۆرگ دەگرێتەوە.

ئینتەرناسیۆنالیستەکان، کە پلانیان هەبوو بەشداری لە چالاکییەکەدا بکەن لەلایەن پۆلیسەوە رێگرییان لێکرا.

ئینتەرناسیۆنالیستەکان پلانیان دانابوو، کە دۆسیە و فایلێکی پڕ لە دۆکیۆمێنت و بەڵگە لەسەر بەکارهێنانی چەکی کیمیایی لە لایەن دەوڵەتی تورکەوە پێشکەشی ڕێکخراوی قەدەغەکردنی چەکی کیمیایی (ئۆ پی سی دەبلیو / OPCW) بکەن.

کاتێک پۆلیس ڕێگریی لەو هەوڵەى ئینتەرناسیۆنالیستەکان کرد، یوکسەل کۆچ هاوسەرۆکی کەجەدەکەى ئەوروپا و شاندێک خواستیان دۆسیە و بەڵگەکانی بەکارهێنانی چەکی کیمیایی لەلایەن دەوڵەتی تورکەوە پێشکەش بە ڕێکخراوی قەدەغەکردنی چەکی کیمیایی (ئۆ پی سی دەبلیو / OPCW)  بکەن، بەڵام دیسانەوە رێگری لەوانیش کرا و رێگایان پێ نەدرا بەڵگەکان پێشکەش بکەن.

چالاکوانان کاردانەوە و ناڕەزایەتیان بەرامبەر ئەوە نیشاندا، کە دەزگا و رێکخراوە نێونەتەوەییەکان بە تایبەتی ئۆ پی سی دەبلیو بووەتە هاوکار و بەشدار لە هێرشی چەکی کیمیاییدا بۆ سەر گەلی کورد.

یەکەم ئێشکگریی ئەم هەفتەیە بە ڕێپێوانێک بۆ بەردەم دادگای دادی لاهای کۆتایی پێهات.

ژ.ت