ڕاپەڕینی 'ژن، ژیان، ئازادی' کە لە دوای کوشتنی ژینا ئەمینی لەلایەن 'پۆلیسی ئەخلاقی' دەوڵەتی ئێرانەوە دەستیپێکرد تاوەکو دێت گەورەتر دەبێت. لە ئەنجامی ئەو گەورەبوون و گەشەکردنەدا هێرشی هێزەکانی دەوڵەتیش بۆ کۆتایی پێهێنانی چالاکییەکان ڕوویان لە زیاتر و توندتر بووونەتەوە.

لە تاران هێزەکانی دەوڵەتی ئێران بە چەک هێرشیان کردە سەر خوێندکارانی تاران و ژمارەیەک خوێندکاریان بریندار کرد.

شەوی ڕابردوو خۆپیشاندەران لە سەقز ئاگریان لەسەر شەقامەکان کردەوە و دروشمی ئازادیان وتەوە. هاوکات لەگەڵ چالاکییەکاندا دووکان و بازاڕەکانیش داخران.

هەروەها لە شاری بۆکان مانگرتن هەبوو، دووکان و بازاڕەکان داخران و کرێکاران نەچوونە سەر کارەکانیان. هەروەها لە شاری مەریوان بۆ یادی چلەی شەهیدانی زاهیدان بازاڕ و دوکانەکان داخران.

دانیشتوانی شاری قوروێیش ڕژانە گۆڕەپان و مەیدانەکان و ناڕەزاییان نیشاندا. هاوکات کچەخوێندکارەکان بەدروشم لەشەقامەکان ناڕەزایەتیی خۆیان نیشاندا.

هەروەها لە شاری سنە مانگرتن هەبوو و هەموو دووکان و بازاڕەکان داخرابوون.

خوێندکارانی زانکۆی هونەری تەورێز بەشانۆگەرییەک تیشکیان خستەسەر کۆمەڵکوژیی خۆپیشاندەران لەزاهیدان.

لە چلەی "هەینی خوێناویی زاهیدان" دووکانەکان نەکراونەوە.

هێزێکی گەورە لەسەر ڕێگای نێوان سنە -دیواندەرە بینراوە.

دوو زیندانی سیاسی بەلوچ بە ناوەکانی ڕەشید بەلوچ و ئیسحاق ئەسکانی لە زیندانی زاهیدان لەسێدارەدران. ئەو دوو دەستگیرکراوە ٥ ساڵ پێش ئێستا بەتۆمەتی کوشتنی ٧ سەربازی دەوڵەت لەسەر سنووری بەلوچستان دەستگیرکرابوون و سزای لەسێدارەدانیان بەسەردا سەپێنرابوو.

بەگوێرەی زانیارییەکان لە ناوچەکەوە، دەوڵەتی ئێران هەوڵ دەدات بە توندوتیژی و هێرش بۆ سەر خۆپیشاندانەکان، کۆتایی بە چالاکییەکان بهێنێت، بۆ ئەو مەبەستەش بەتوندی پەلاماری چالاکوانان دەدات و هەڕەشەی کوشتنیان لێدەکات.

بەپێی ئامارەکانی ڕێکخراوی مافی مرۆڤی ئێران، لە کاتی دەستپێکردنی خۆپیشاندانەکان دا لە ئێران و ڕۆژهەڵاتی کوردستان، بەلایەنی کەمەوە ٣٠٤ کەس کوژراون، کە ٤١ کەسیان منداڵ بوون.

نیگەرانی هەیە، کە ئەم ژمارەیە زۆر زیاتر بێت.

ژ.ت