لە ١٢ی ئاداری ١٩٩٥ لە گەڕەکی گازی ناوچەی سوڵتان گازی ئەستەنبوڵ ٢٢ کەس لە هێرشێکدا کۆمەڵکوژ کران. بەو بۆنەوە لەبەردەم ناوەندی پەروەردە و کولتووری گازی چالاکی بەڕێوە چوو و بەسەدان کەس تێدا بەشدارییان کرد.

چالاکیی یادکردنەوەکە بە پەردەلادان لەسەر مێنومێنتێک کە بۆ یادی قوربانییەکان دروستکرابوو دەستیپێکرد. کەسوکاری کۆمەڵکوژییەکەی گازی و عومرانیە و زۆرێک لە لایەنە سیاسییەکان بەشدارییان لە یاد کردەنەوەکەدا کرد.

لە چالاکییەکەدا، قەدریە دۆغان، هاوسەرۆکی کۆمەڵەی دیموکراتیکی عەلەوییەکان (داد) قسەی کرد و سەرنجی دایە سەر ڕۆڵی عەلەوییەکان لە بەدیهێنانی ئاشتی کۆمەڵایەتی لە تورکیا.

پاشان جەلال فرات پەرلەمانتاری ئەستەنبوڵی دەم پارت قسەی کرد و وتی: "لە کەربەلاوە هەتا ئەمڕۆ ئازاری زۆرمان چەشتووە. بۆچی تووشی ئەم کاراساتانە دەبین؟ لە کاتێدا تا ئێستا هیچ کام لە ڕێکخراوەکانی ئێمە فەرمانی کۆمەڵکوژییان بۆ هیچ  قەوم و نەتەوەیەک نەداوە."

دوای وتارەکان، جەماوەر بە ڕێپێوان بەرەو ئەو پۆستەخانەیەی کە کۆمەڵکوژییەکە تێدا ڕوویدا رێپێوانیان کرد. لەوێ سینەم گوندوز، کچی محەمەد گوندوز کە لە کۆمەڵکوژییەکەدا ژیانی لەدەستدا، بەیاننامەیەکی خوێندەوە و وتی: "ئامانجی بکوژەکان هاندانی گەل بوو بۆ ئەوەی شەڕ لە نێوان عەلەوی و سوننەدا هەڵگیرسێت. گەلی گازی لە ئامانجەکەیان ئاگادار بوو." گوندوز لە کۆتایی بەیاننامەکەدا داوای دادگایی کردنی بۆ بەرپرسیاران و تاوانبارانی ڕووداوەکە کرد.

دواتر، جەماوەر لە بەردەم پۆستەخانەکەوە بەرەو گۆڕستانی قوربانیەکان ڕێپێوانیان کرد و چالاکییەکە کۆتایهات.