نوسینگەی وەزیری ناوخۆی عێراق لە راگەیێندراوێکدا بڵاویکردەوە، ئەمڕۆ سێشەممە ٢٩ی ئابی ٢٠٢٣ عەبدولئەمیر شەممەری، وەزیری ناوخۆی عێراق لە فڕۆکەخانەی نێودەوڵەتی بەغدا پێشوازی لە ئەحمەد وەحیدی هاوتا ئێرانییەکەی و شاندی یاوەری کرد.

نوسینگەی راگەیاندنی وەزیری ناوخۆی عێراق بڵاویکردەوە: "دوابەدوای گەیشتنی ئەحمەد وەحیدی وەزیری ناوخۆی ئێران، لەگەڵ وەزیری ناوخۆی عێراق کۆبوونەوەیەکیان ئەنجامدا و تیایدا جەختکرایەوە لە پتەوکردنی پەیوەندییەکانی نێوانیان و گفتوگۆش لەبارەی ئەو بابەتانەوە کرا کە مایەی نیگەرانی هەردوولابوون".

ئەم سەردانەی وەزیری ناوخۆی ئێران بۆ بەغدا لەکاتێکدایە، دوێنێ دووشەممە، ناسڕ کەنعانی وتەبێژی وەزارەتی دەرەوەی ئێران ڕایگەیاند:" بەپێی ئەو رێککەوتنەی لەگەڵ حکومەتی عێراق ئەنجاممانداوە، دەبێت ئەو گروپانەی دژ بە حکومەتەکەمانن لەو وڵاتە دابماڵرێن لە چەک و بنکەکانیان چۆڵ بکەن".

ئاشکراشی کرد: "وادەی دیاریکراو بۆ جێبەجێکردنی رێککەوتنەکەمان لەگەڵ حکومەتی عێراق لەوبارەیەوە، ١٩ی مانگی داهاتووە و ئەو وادەیەش بە هیچ شێوەیەک درێژناکەینەوە، رێکخراوی نەتەوەیەکگرتووەکانیش لە بابەتەکە ئاگادارکراوەتەوە".