ئەمڕۆ، یەکشەممە، تەژەئا ۆرک شۆپێکی ئەنجامدا دەربارەی ساڵیادی پەیماننامەی لۆزان بە ناونیشانی "ژنان گفتوگۆدەکەن دەربارەی یادی سەد ساڵەی لۆزان"، چالاکییەکە لە هۆتێلێکی شاری ئامەد، بە بەشداری چەندین ژن لە ئامەد و شارەکانی تر بەڕێوەچوو، چالاکوانی تەژەئا، چاگلار دەمیرڵ، وتەی پێشوازی خوێندەوە.

چاگلار، ئاماژەی بەوە کرد بۆ گفتوگۆ دەربارەی لۆزان کۆبوونەتەوە، ئەو بڕیارانەی لە لۆزان دراون سەد ساڵە جێبەجێ دەکرێن، گوتی: "گفتوگۆ دەکەین دەربارەی بڕیارەکانی پەیوەست بە گەلی کورد و عەلەوی و ئاشوری و ئەرمەن و ئێزدی و هەموو گەلانی چەوساوە لەماوەی سەد ساڵەی پەیماننامەی لۆزان. هەموو ئەم بڕیارانە هەموو لای پیاوانەوە دەرچوون،  لە لۆزاندا چۆن بە زیهنیەتی پیاوسالاری ژن و گەل لەناوبران؟ چۆن ئەسیمیلەکران؟ پێکەوە ئەم ڕۆژە بە گفتوگۆکردن لەم باسانە بەسەر دەبەین".

چاگلار تیشکی خستە سەر ئەوەی، زمان و چاند لە لۆزان قەدەغەکران و گوتی: "چ بەسەر ژن و چاند و زماندا هات؟ ئێمەی ژنانی میزۆپۆتامیا لەپاڵ کۆششە مەزنەکانمان، تووشی ئازاری زۆر هاتووین، بەڵام دەبێت بزانین لێرەوە چی دەکەین، ژنان ئەم ستەم و قڕکردنەیان قبووڵ نەکرد و قبووڵیشی ناکەن، بە هەر شێوەیەک بێت، یەکێتی گەلان و ژن دەپارێزین، پێکەوە بڕیار دەدەین. ئێمە وەک تەژەئا پێکەوە یەکێتی خۆمان ڕادەگەیەنین، تێکۆشانێکی بەهێز دەکەین".

پاش وتەی پێشوازی، ۆرک شۆپەکە دوور لە چاوی ڕاگەیاندنەکان بەردەوام بوو، وا بڕیارە تا کاتژمێر ١٧:٠٠ بخایەنێت.