خۆپێشاندانی سەرتاسەری بە دەستپێشخەری کۆنگرەی نەتەوەیی کوردستان-کەنەکە و بەشداری زۆرینەی لایەنە سیاسیی و ڕێکخراوەکانی کۆمەڵگەی مەدەنی لە باشووری کوردستان، ماوەیەک پێش ئێستا دەستی پێکرد.

بڕیارە خۆپێشاندانەکان بە مەبەستی پشتیوانی لە بەرخۆدانی عەفرین و هەروەها شەرمەزارکردنی دەوڵەتی تورکیا، هاوکات لە چەندین شار و شارۆچکەی باشووری کوردستان بەڕیوە بچێت.

هاووڵاتیانی شاری سلێمانی لە شەقامی 'سەهۆڵەکە'، دەستیان بە ڕێپێوان کردووە و بەرەو باخی گشتی دەڕۆن. بڕیارە لەوێ بە لێدوان و خوێندنەوی پەیامەکان، کۆتایی بە ڕێپێوانەکە پێبهێندرێت.

 لە شاری هەولێریش، هاووڵاتیان لە پارکی شانەدەری شارەکە کۆبوونەوە و بە درووشمەکانیان پشتیوانی عەفرین دەکەن.

لە شاری هەڵەبجە-ش، هاوولاتیان لەبەردەم بانکەکۆنەکە کۆبوونەتەوە و درووشمی بەرخۆدانی بۆ عەفرین دەڵێنەوە.

لە شاری ڕانیە، خۆپێشاندان لە بەردەم خوێندنگەی ئامادەیی کچانەوە بۆ سەرای ڕانییە دەستیپێکرد.