ڕێکخراوە سیاسی و مەدەنییه‌کانی شەنگال داوا لە کۆمەڵگەی نێودەوڵەتی دەکەن لە به‌رانبه‌ر ھێرشەکانی دەوڵەتی تورکیای داگیرکەر بۆ سەر عەفرین بێدەنگ نه‌بن. داواش ده‌كه‌ن جیھان سزای کردەوە نامرۆڤانەکانی دەوڵەتی تورکیا بدات.
ئەمڕۆ ئەنجومەنی خۆبەڕێوبەری شەنگال، پارتی ئازادی و دیموکراتیی ئێزدی، تەڤگەری ئازادیی ژنانی ئێزدی، ڕێکخراوی خانه‌واده‌ی شەھیدان و یەکێتیی گەنجانی ئێزدی، په‌یامێكی ھاوبەشیان ئاراستەی نەتەوەیەکگرتووەکان، یونسێف، کۆنگرێسی ئەمه‌ریکا، یەکێتیی ئەورووپا، ڕێکخراوی مافی مرۆڤ، ڕێکخراوی جیھانیی ژنان، ئەنجومەنی دومای ڕووسیا و ھەموو رێکخراو و ناوەندەپەیوەندیدارەکانی مافی مرۆڤ کرد.
له په‌یامه‌كه‌دا ھاتووە: لە ڕۆژی ٢٠ی شوباتی ٢٠١٨\٣٠ی به‌فرانبار-ه‌وە سوپای تورکیا و چەتەکانی ھاوپەیمانی ده‌ستیان كردووه به ھێرشی دڕندانه بۆسەر گەلی عەفرین، بە فەرمانی ئەردۆغان ھێرشی قڕکردن به‌رانبه‌ر گەلی فره‌ڕه‌نگ، فرەئه‌تنیك و فرەئاینیی عەفرین ئەنجامدەدرێت. ئەوە پرۆسەی قڕکردنی ژمارە ٧٤ی گەلی ئێزدییه.
«ھیچ لامان سەیر نییە کە سوپای تورک ھێرش و ئۆپەراسیۆنی سەربازی لە شوێنی ئێزدینشینه‌كان ئه‌نجام بدات، جا ئەو شوێنە شەنگال بێت یان باشیك، یان عەفرین و بەحزان، چونکە ئەوان دوژمنی خەڵکی ئێزدین و دەیانەوێت لەناومان ببەن و خاکەکەمان داگیربکەن، لەو ٧٤ فەرمانەی کە بە سەر خەڵکی ئێزدی ھاتووە زیاتر لە ٦٠ فه‌رمانیان لە لایەن تورکەکانەوە ئەنجام دراوە، ھەزاران گوند و ملیۆنەھا ھاوڵاتیی ئێزدی لە سەردەمی عوسمانییەکاندا لە خاکی ژێڕ ئیمپراتۆرییه‌تیاندا دەژیان، بەڵام بەردەوام کۆمەڵکوژکران، لە ئەنجامی دوایین فەرماندا کە لە ساڵی ٢٠١٤دا ڕوویدا، ژمارەیەکی زۆر لە خه‌ڵكی ئێزدی ئاوارەبوون و ناچارکران شوێنی ژیانیان بەجێبێڵن.»
لایه‌نه‌كانی شەنگال ئاماژه‌یان بۆ ئه‌وه كردووه ، بێدەنگیی جیھان لە به‌رانبه‌ر ھێرشە دڕندانەکانی سوپای تورکیا و چەتەکانی ھاوپەیمانی، تووشی شۆکی کردووین. بەجۆرێک ئەردۆغان بێ گوێدانە یاسا نێودەوڵەتییه‌کان و مافەکانی مرۆڤ گەلی ئێمە لە عەفرین کۆمەڵکوژ دەکات.
لە کۆتایی ڕاگەیەندراوەکەدا ھاتووە، بە ناوی مرۆڤەوە بانگەوازی ئێوەی پارێزەرانی مافەکانی مرۆڤ دەکەین، کە ئۆپەراسیۆن و ھێرشی سوپای تورک بۆ سەر عەفرین بوەستێنن، بەھۆی بۆردومانەکانی سوپای تورکەوە خەڵک و منداڵان دەکوژرێن و ئاوارە دەبن، سوپای تورک دژی پێکھاتە جیاوازەکانی عەفرین تاوان ئەنجام دەدات، ھەروەھا داوا دەکەین لێكۆڵینه‌وه بكه‌ن لەبارەی تاوانەکانی ئەردۆغان لە دژی خەڵکی ئێزدی و قه‌ره‌بووی ئەو زیانە ماددی و مەعنەوییانە بكرێته‌وه كه بەر خەڵکی ئێزدی کەوتوون.
s.m
