شەڕ لەنێوان هێزێکی کوردی و سوپای پاسداراندا ڕوویدا
لە ناوچە سنوورییەکانی شارۆچکەی مەریوان پێکدادان ڕوویدا، دوای ئەوەش سوپای پاسداران ئەو ناوچەیەی بە چڕی تۆپباران کرد.
دوانیوەڕۆی دوێنێ، لە بەرزاییەکانی کانی گوێز لە نێوان گوندەکانی ڕەشەدێ و دووەیسە، سەربە شارۆچکەی مەریوان لە پارێزگای سنەی ڕۆژهەڵاتی کوردستان، پێکدادانێک ڕوویدا.
پێکدادانەکە لە نێوان هێزێکی کوردی و سوپای پاسدارانی ئێران ڕوویداوە و دوابەدوای پێکدادانەکە سوپای پاسداران بە چڕی دەستیکردووە بە تۆپبارانکردنی ناوچەکە.
لەو بارەیەوە سوپای پاسداران ڕاگەیەندراوێکی بڵاوکردووەتەوە و ئەو پێکدادانەی پشتڕاست کردووەتەوە، ڕاشیگەیاندووە ئەو هێزە چەکدارە تیمێکی هەشت کەسی بوون، بانگەشەی ئەوەشی کردووە کە دوو کەس لە تیمەکە کوژراون و چواری دیکەشیان برینداربوون.
هەرچەند دیمەنی تۆپبارانەکە لە تۆڕە کۆمەڵایەتییەکان بڵاوبووەتەوە، بەڵام تا ئێستا هیچ هێزێکی کوردی لەو بارەیەوە ڕاگەیاندراوی بڵاو نەکردووەتەوە.
ف.ق
