ڕۆژی ١٦ی ئەم مانگە لە پارکی ئازادی شاری دهۆک، لەلایەن گروپی "کانێ پاشەکەفت" خۆپیشاندانێک دژی دواکەوتنی مووچە لە لایەن مامۆستایان و فەرمانبەرانەوە ڕێکخرا، پێش دەستپێکردنی خۆپیشاندانەکە چەند کەسێک لە ڕێکخەرانی خۆپیشاندانەکە لە لایەن هێزە ئەمنییەکانی دهۆکەوە دەستگیرکران، پاشان بە گشتی زیاتر لە سەد مامۆستا، ڕۆژنامەنووس، فەرمانبەر و چالاکوان دەستگیرکران و دواتر بەشێکیان ئازادکران و ١٤ کەسێکیشیان تا ئەمڕۆ لە زینداندا مابوونەوە.

خەتاب عومەر، سەرۆکی گروپی پارێزەرانی خۆبەخش لە دهۆک، بە ڕۆژنیوزی ڕاگەیاند: ١٢ کەس لە دەستگیرکراوەکانی خۆپیشاندانەکەی دهۆک کەمێک پێش ئێستا تا ڕۆژی داگایی کردنیان بە کەفالەت ئازادکران.

وتیشی: هەریەک لەو کەسانە بە کەفالەتی دوو ملیۆن دینار سەربەست کراون و ئێستا هەریەک لە 'هاوار بەهجەت مامۆستا و دڵشاد ئیبراهیم، فەرمانبەر' لە زینداندا ماون و بڕیارە سبەینێ ئەوانیش ئازاد بکرێن.

وەک تیمی پارێزەران بەردەوام دەبین لە داکۆکیکردن لەو خۆپیشاندەرانە و بە گوێرەی بەدواداچوونمان لە ئێستادا کەس لەزینداندا نەماوە.

ف.ق