بە بەشداری هەزاران کەس مەراسیمی هەزار دەف لە ڕۆژهەڵاتی کوردستان بەڕێوەچوو
لانی کەم ١٥ هەزار کەس بەشداربوون لە مەراسیمی هەزار دەف لە گوندی دەگاگا لە ڕۆژهەڵاتی کوردستان.
ڕۆژی پێنج شەممە ٤ ی نیسان، مەراسیمی فەرهەنگی-ئایینی هەزار دەف لە گوندی دەگاگا لە ڕۆژهەڵاتی کوردستان بەڕێوەچوو.
لە مەراسیمەکەدا لانی کەم ١٥ هەزار کەس لە ناوچە جیاجیاکانی ڕۆژهەڵاتی کوردستان و سەرانسەری ئێرانەوە بەشداربوون.
بەشداربووان جلوبەرگی کوردی ڕەنگاوڕەنگیان پۆشی و دیمەنێکی قەشەنگیان بە مەراسیمەکە بەخشی. هەروەها پۆشینی جلوبەرگی کوردی و فەرهەنگی کوردستان سەرنجی میوانانی ناوچە جیاجیاکانی ئێران و نا کوردەکانی ڕاکێشا.
لە چوارچێوەی مەراسیمەکەدا، پێشانگای کاری دەستی و فۆلکلۆری هەورامان و بەرهەم و خۆراکەکانی تایبەت بە ناوچەکە کرایەوە و پیشانی میوانان درا.
هاوکات ژنان جێگەیەکی تایبەتیان تەرخانکرد بۆ دروستکردنی نان و کەلانە و خواردنی خۆماڵی.
لە مەراسیمەکەدا بەگوێرەی بیناسازی هەورامان، دەفژەنان لەسەر خانووی گوندە ڕیزیان بەست و هونەری خۆیان پێشکەش کرد ئەمەش جۆشوخرۆشێکی تایبەتی بە مەراسیمەکە بەخشی.
دەفژەنان بە ژن و پیاو و مناڵەوە بە پۆشینی جلوبەرگی ڕەسەنی کوردییەوە هونەرەکەیان پێشکەش کرد، ژمارەیەکی زۆری دەفژەنان ژنان و کچان بوون.
لە مەراسیمەکەدا شاعیرێکی خەڵکی گوندەکە چووە سەر ستەیج و شیعرەکانی بۆ ئامادەبووان خوێندەوە. هەروەها پرسەکانی ناوچەکە و بەتایبەت پرسی کۆڵبەران خرایە بەرباس و داوای دۆزینەوەی چارەسەر کرا.
