لە ١٧ی نیسانی ٢٠٢٢ سوپای تورک هێرشی داگیرکاریی لە دژی هەرێمەکانی زاپ و ئاڤاشین و مەتینا دەستپێکرد. گەریلاکانی هەپەگە و یەژاستار لە دژی شەڕی داگیرکاری چالاکی ئەنجام دەدەن. سوپای تورکی داگیرکەر لە ناوچەی وەرخەلی ئاڤاشین کامێرای چاودێریی دانابوو و دەیانخواست لە رێگەى ئەو کامێرانەوە چاودێریی گەریلاکان بکەن، بەڵام ئەو کامێرانە لەلایەن گەریلاکانەوە کرانە ئامانج و تێکشکێنران.

پشتیان بە کامێرا چاودێرییەکانیان بەستووە!

گەریلاکان بەتۆمارکردنی چالاکییەکانیان هەواڵی ساختە و درۆزنانەى میدیاکانی تورکیان پووچ کردەوە. دوو گەریلا بە ناوەکانی ڕێڤان و چالاک لە ناوچەی وەرخەلی ئاڤاشین چالاکییەکیان لە دژی کامێراکانی چاودێریی سوپای تورکی داگیرکەر ئەنجامدا.

چالاک و ڕێڤان بۆ کامێرای گەریلایەکی دیکە قسەیان کرد و وتیان، بۆ ئەنجامدانی چالاکی هاتوون بۆ ناو ئەو سەنگەرانە، کە سوپای تورک داگیری کردوون.

گەریلاکان ڕایانگەیاند، سوپای داگیرکەر ناتوانێت بەرگەی گەریلا بگرێت و شوێنەکەی خۆی جێهێشتووە و ڕایکردووە و دەشڵێن: "ناتوانن شەڕ بکەن، لەبەر ئەوەش هەموو جۆرە تەکنەلۆژیایەکی گەورە و پێشکەوتوو لە دژی ئێمە بەکاردەهێنن. ئێمەش لە دژی ئەو  تەکنیک و تەکنەلۆژیایەى دوژمن شەڕ دەکەین. ئێمە لە چەند ساتێکی دیکەدا لێرەدا کامێرا چاودێرییەکەیان تێکدەشکێنین".

بونەتە دیلی تەکنەلۆژیاکەی خۆیان

گەریلا چالاک و ڕێڤان پاش ئەنجامدانی چالاکییەکەیان بە سەلامەتی گەڕانەوە و ڕایانگەیاند، سەربازانی سوپای تورک ئیرادەیان نەماوە، تەنها لە دوورەوە بە تۆپ و هاوەن و چەکی قورس و هێرشی ئاسمانی شەڕ بکەن.

تێکشکاندنی ئەو کامێرایانە لەلایەن گەریلاکانەوە جارێکیتر ئەوە دەسەلمێنن، کە سوپای تورک ناتوانێت لە دژی گەریلا شەڕ بکات و بووەتە دیلی تەکنەلۆژیا.

ژ.ت