کامەران عوسمان، ئەندامی ڕێکخراوی CPTـی ئەمریکی لە هەژماری تایبەتی فەیسبووکی خۆی لە دیجیتاڵ میدیا ، زانیاری لەسەر تۆپبارانەکانی ئەمڕۆی سوپای دەوڵەتی تورکیا بۆسەر سنووری دهۆک خستەڕوو.

کامەران عوسمان ئاماژەی بەوەداوە: "لە کاتژمێر ٠٩:١٠ خولەکی سەر لە بەیانی ئەمڕۆوە تاوەکو کاتژمێر ١٥:٠٠ تۆپخانەکانی سوپای تورکیا (٣٥) جار تۆپبارانی چیای گارا و ناو گوندەکانی (مژێ، کەفنە مژێ، سپیندارێ و گرگاشێ)ـیان لە بەری گارێ لە سنووری ئامێدی سەربە پارێزگای دهۆک کردووە."

ئاماژەی بەوەشداوە، تۆپبارانەکان بۆ ناو ڕەزوباخی هاوڵاتیان و خانووی چۆڵکراوی گوندنشینان بووە، بەهۆیەوە زیان بەر کێڵگەی کشتوکاڵی، خانوو و ڕەزی جوتیارانی ئەو گوندانە کەوتووە.