ئەندامی مەجلیسی پەژاک مەزڵوم حەفتەن سەبارەت بە لەسێدارەدانی چالاکوانانی سیاسی لە ئێران رایگەیاند: "دەبێت ئێمە كارێك بكەین كە تێچووی كوشتن و لەسێدارەدان بۆ رژێم گرانتر تەواو بێت. كاتێك تێچووی قورس و گران بوو ئەوا ئەو كارە ناكەن"
ئەندامی مەجلیسی پارتی ژیانی ئازادی كوردستان، مەزڵووم حەفتەن لەسێدارەدانی غۆڵامڕەزا رەسایی گەنجی یارسانی لەلایەن رژێمی ئێرانەوە شەرمەزار كرد و رایگەیاند؛ رژێمی ملی ـ مەزهەبی قاجار چۆن بێ پرس و وەڵام شاتەیمور بانیارانی كوشت، رژێمی مەزهەبی ـ ملی ئیسلامی ئێران هاوشێوەی قاجارەكان رەزا رەساییان بێ پرس و وەڵام لەسێدارەدا، هەردوویان خاوەن یەك لۆژیك و زیهنیەتن، تەنیا ناویان جیاوازە، یەكیان قاجارە و ئەویتر ویلایەتی فەقێ. ئەوەش كردەوەیەكی نامرۆڤانە و ناعادلانەیە و شەرمەزاری دەكەم و سەرەخۆشی لەبنەماڵە و كەس و كار و گەلی كورد بەگشتی دەكەم.
حەفتەن راشیگەیاند؛ رژێمی ئیسلامی ئێران خۆیان بە یارانی حوسێن و بەردەوامی بنەماڵەی عەلی دەزانن كەچی لەمانگی موحەرەم و ئەربەعین و لەسەر ناوی شیعەی عەلەویی حكومەت بەڕێوە دەبەن، بەڵام هاوشێوەی یەزیدەكان گەنجانی كورد و بەلوچ و عەرەب و گەلانی تر لەئێران لەسێدارە دەدەن.
مەزڵووم حەفتەن ئەندامی مەجلیسی پەژاك؛ سەبارەت بە هۆكاری زۆربوونی لەسێدارەدانەكان لەلایەن رژێمی ئێرانەوە دەڵێت؛ بەدەست پێكردنی شۆڕشی ژن، ژیان، ئازادی كە بەپێشەنگایەتی ژنی كورد و كوردان و بەلوچ و نەتەوەكانی تری ئێران هاتە ئاراوە، رژێم دەیەوێت گەلی كورد و بەلوچ بێدەنگ بكات و دەیەوێت هاوشێوەی دەیەكانی رابردوو دەنگی ئازادیخوازان و پێشەنگانی كۆمەڵگە و گەلانی ئێران لەزیندانەكاندا كپ بكات. بۆیە دەبێت گەلان و پێكهاتەكانی نێو ئێران جیا لەناسنامەی نەتەوەیی، ئەتنیكی، ئاینی و مەزهەبی و رەگەزی بەخۆڕێكخستن و گوشارهێنان بۆ رژێم و بەهەستكردن بەبەرپرسیاریەتی مرۆڤی و دیموكراتی و ئەخلاقی و نیشتیمانی هەوڵ بدەین دیاردەی لەسێدارەدان لەئێراندا هەڵگیردرێت.
ئەمڕۆ رژێمی ئێران شوێنی یەزیدی هاوچەرخی گرتووەتەوە
ئەندامەكەی مەجلیسی پەژاك مەزڵووم حەفتەن سەبارەت بەلەسێدارەدانی گەنجی یارسانی"غوڵامڕەزا رەسایی" دەڵێت؛ كوشتنی حكومەتی غوڵامڕەزا رەسایی، گەنجی یارسانی كرماشانی شەرمەزار دەكەم و هاوخەمی خۆم بۆ بنەماڵە و كەس و كاری رەسایی، خەڵكی سەهەنە، كرماشان و گەلی كورد بەگشتی دەردەبڕم. بێگومان ئەوەی لەسێ شەممەی رابردوو لەزیندانی دیزڵئاباد و سێدارەدانی غۆڵامڕەزا رەسایی پێكهاتووە جێی شەرمەزاریە بۆ رژێم. خەڵكی یاری و كرماشان هەموو دەزانن لەسەردەمی قاجاڕەكان لەمەیدانی سەوزە"مەیدانی كرماشان" شاتەیموری بانیارانی هاوشێوەی غۆڵامڕەزا رەسایی كوژرا. ئەو كات حكومەتی قاجاڕ لەسەر دەسەڵات بوو. حكومەتێكی ملی ـ مەزهەبی بوو. ئەمڕۆش ویلایەتی فەقێیە و مەزهەبی ـ ملییە. زۆر لەیەكتر جیاواز نین، ناویان جیاوازە، یەكیان شا و ئەو دیكەیان ویلایەتی فەقێیە. بۆ كوشتنی پێكهاتەكانی تر و باوەڕمەندانی یاری یەكن و جیاوازیان نییە. ئەو كات كە بڕیاری كوشتنی شا تیموری بانیارانی دا، ووتیان بێ پرس و وەڵام بیكوژن. ئەمڕۆش ئەوەی لەزیندان دیزڵئاباد بەسەر غۆڵامڕەزا رەسایی هاتووە، هەمان شتە و هەمان كردەیە. بێ پرس و را و وەڵام؛ كوشتنە. بێگومان رژێمی ئێران بەخۆی دەڵێت؛ ئێمە ئاڵی عەلین، یارانی ئیمام حوسێنین. ئێستاكەش هاوكاتە لەگەڵ مانگی موحەڕەم و وەك خۆیان دەڵێن ئەربەعینە. لەڕاستیدا دەڵێن ئێمە یارانی حوسێنین، حوسێن لەغەریبی و بێكەسی و زوڵم و ناعەدالەتی كوژرا، زەینەب و هاوڕێیانی بەدیلگیران. ئەوەی لەزیندان دیزڵئاباد كردویانە هەر هەمان شتە. هەر دووبارە بوونەوەی رووداوی كەربەلایە. بەڵام ئەمڕۆ حوسێن و یەزید جیاوازن و جێیان گۆڕاوە. ئەوانەی كە ئەمڕۆ خۆیان وەك یاری حوسێنی دەبینن و بنەماڵەی عەلین و لەسەر ناوی شیعەی عەلەویی حكومەت بەڕێوە دەبەن كارێك دەكەن كە یەزیدیەكان نەیانكردوە. كوشتنی غۆڵامڕەزا رەسایی، تاكە كەسێك یاخود شەخسێك بەتەنیا نییە. بەتەنیا كوشتنی تاكێكی كورد، یاخود تاكێكی یارسانی نییە. ئەوە پاشخانێكی مێژوویی و دوور و درێژی هەیە. باوەڕ دەكەم هەر كەسیش بەو چاوەوە سەیری ئەو كوشتنانە دەكات.
ئەمڕۆ كوشتنی كورد، بەلووچ، عەرەب و ژن، بووەتە رۆژەڤێكی سەرەكی و بووەتە دیاردەیەك. بەدەستپێكردنی شۆڕشی ژن، ژیان، ئازادی و بەتایبەت بڕیاری حكومەتی وەرگیراوە، بەهۆی ئەوەی كە شۆڕشی ژن، ژیان، ئازادی هۆكاری گۆڕانكاریی ریشەیی لەنێو كۆمەڵگەی ئێران و ناوچەكە و دنیای لەگەڵ خۆیدا هێناوە. لەئێران خاڵێكی وەرچەرخانی هێناوەتە ئاراوە. لەڕاستیدا پێشەنگایەتی ئەو شۆڕشە ژن و كورد بوون، هەڵبەتە بێ مافییە ئەگەر بڵێین گەلانی تریش لەنێو شۆڕش دا جێگایان نەگرتووە، بەڵام پێشەنگایەتی ژن، كورد و بەلوچ دیاركەر بوو. بۆ ئەوەش قوربانیان دا. بەدەستپێكردنی شۆڕشی ژن، ژیان، ئازادی بڕیارێكی حكومەتی درا، و بڕیاریان داوە كە گەلی كورد و بەلوچ پێویستە بێدەنگ بكرێن. پێویستە تەسلیم و وەڵامی ئەو كردەوەیەی دەستیان پێكردوە بدەنەوە. ئەگەر سەیر كەین لەوكاتەوە تا ئەمڕۆكە هەرچەندە پاشخانێكی خۆی هەیە، بەڵام بە شێوەیەكی ئاسایی و لەئاستی هەری ژووردا كوردكوژی، بەلوچ كوژی و گوشاری سەر ژنان و لەسێدارەدانی ژنان بووەتە، دیاردەیەك و پرسێكی گەورە. لەحەقیقەتدا دەبێت هەر كەسێكی ئازادیخواز، دیموكراتیكخواز و هەر تاكێك، جیا لەشوناسی ئاینی، مەزهەبی، نەتەوەیی و رەگەزی بەگوێرەی بەرپرسیاریەتی ئەخلاقی و ئەركی كۆمەڵایەتی لەبەرامبەر بەو كردەوانەی رژێم هەڵوێست نیشان بدات.
تۆڵەی شۆڕشی ژن، ژیان، ئازادی لەكورد و بەلوچ دەكرێتەوە
ئەندامی مەجلیسی پەژاك، مەزڵووم حەفتەن لەسەر گوشارەكانی سەر گەل و لەسێدارەدانەكان وەها دەڵێت؛ ئەو زەخت و گوشارانەی لەسەر رژێمە، ناتوانێت لەبەرامبەریان راوەستێت و تەنگەتاو بووە؛ مەخابن ئەو گوشارانەش لەسەر گەلانی نێوخۆی ئێران بەتاڵ دەكاتەوە. بەتایبەتی بەسەر كورد و بەلوچ و ژن هەڵێدەڕژێنێت. لەشوێنی ترەوە لەژێر زەخت و گوشاردایە، كەچی ئەوە بەسەر گەلدا بەتاڵ دەكاتەوە. خەڵك ئەوە قەبوڵ نەكات. گەندەڵی گەورە، سۆڵتانە دزەكان، لەسوڵتانی سكە بگرە تا سوڵتانی پارە و نەفت، بەشێوەی جیاجیا دەوڵەمەندیەكانی گەلان دەدزن و كەس لێیان ناپرسێتەوە. تەنیا كۆڵبەری كورد و بەلووچ، رۆژانە بەقەناس دەكوژرێن. ئەو ئینسانانە بۆ سفرەی ماڵ و منداڵیان كە بێ نان و ئاون دەیانەوێت شتێك پەیدا بكەن و رۆژانە دەكوژرێن و دەبنە قوربانی. كەس لەوانە ناپرسێتەوە. هاوكات ئەوە كوشتنی پەلە بەپەلەیە. ئەو رژێمە وای دادەنێ كە ئەگەر كۆمەڵكوژی بەسەر كورد و بەلوچ و گەلانی تر بەڕێوە ببات، كاردانەوەكان لەبەرامبەری زۆر نابێ، بۆیە دێ و بەردەوام ئەو كردەوە دووبارە دەكاتەوە. رۆژانە بەشێوەیەكی پلەبەپلە ئەو كۆمەڵكوژییانە ئەنجام دەدات. هەر رۆژ كۆڵبەر دەكوژرێت. هەر رۆژ مرۆڤەكان لەسێدارە دەدرێن، هەر رۆژ بەلوچ دەكوژرێت، ژنان لەسێدارە دەدرێن، ئەوە كۆمەڵكوژیەكی پلەبەپلەیە. لەبەرامبەر بەو كردەوانەی رژێم هەڵوێست پێویستە. بێگومان رژێم سەیر دەكات كە ئەو كردەوانەی ئەنجامی دەدات تێچووی بۆی هەرزان تەواو دەبێت. واتا بۆی خەرجێكی زۆر كەم هەڵدەگرێت. ئەگەر خەرجییەكەی زۆر ببا، رژێم زوو زوو ئەو كردەوە نامرۆڤانەی دووبارە نەدەكردەوە. ئەگەر ئەمڕۆ گەلی كورد و بەلوچ دەكوژرێن و مرۆڤی جودا لەسێدارە دەدرێن و گوشار لەسەر زیندانیانی سیاسی هەیە، لەبەر ئەوەی باجی كەمە بۆ رژێم. هەر مرۆڤێكی ئازادیخواز كە هەڵگری ناسنامەی چەپگەرییە پێویستە لەخۆی بپرسێت كە ئێمە دەبێت چی بكەین كە ئەو تێكچووە بۆ رژێم گرانتر بكەین. بۆ ئەوەی ئەگەر كەسێك لەسێدارەدا حیسابی خۆی بكات، هەروا بەئاسانی ئەو كردەوانە دووبارە نەكاتەوە. ئەگەر تێچووەكەی بەرز بێت، ئەوا لەسێدارە نادات، كۆڵبەر ناكوژێت. ئەگەر تێچووەكەی بڵند بێ، نزیكبوونەوەی رژێم لەگەڵ ژن، لەگەڵ زیندانی سیاسی و لەگەڵ گەلەكەی جیاوازتر دەبێت، ئەو كات ناچارە كە ئیرادەیان بەبنەما بگرێت و حیسابیان بۆ بكات.
رژێم لەڕۆژی هاتنە سەردەسەڵاتەوە تا ئێستاكەش دەیەوێت بەفرت و فێل و پیلان گەلی كورد بەكار بهێنێت و بەو شێوەیە نزیكی پرسی كورد بووەتەوە. هەر لەم ماوەیە دا بوو كە بۆ هەڵبژاردن لەلوڕستانەوە بگرە تا ورمێ هاتن و چوون. جل و بەرگی كوردی و جلی لوڕی لەبەر كرد و بەلوڕی و كوردی قسەیان كرد. بەخەڵكیان ووت كە شۆڕشگێڕن، فیداكارن، مێواندۆستن، سنورپارێزن، سنورپاراستن و هێزی ئەم وڵاتە بەدەست ئێوەوەیە، ئێمە خزمەتكاری ئێوەین و هەروەها. بەڵام سەیركەن چەند رۆژ بەسەر ئەو ئاخاوتنانەیاندا تێپەڕ نەبوو، زۆرترین لەسێدارەدانەكان لە كوردان و لوڕ پێكهات. ئاخۆ ئەوان حیسابی ئەوە ناكەن كە ئەو گەلە ئەوەندە كورت بیر نییە كە ئەو شتانە لەبیر بكات. لەناوچەكە و لەسەر ئاستی نێونەتەوەیی حیسابی گەورەیان بۆ خۆیان كردوە. لەناوچەكە هاوپشتی و هاوكاری سەفەوی و عوسمانی بۆ كوردكوشتن رێككەوتن كراوە و پێكهاتووە. كوردستان و ناوچە كوردیەكان، داگیر و دەستبەسەر و دەكوژن و لەسێدارە دەدەن و تاڵان دەكەن، كۆڵبەر دەكوژن و هەر شت بەسەر كوردان دێنن. هەر لەڕۆژئاواوە بگرە تا باكور، باشور و رۆژهەڵات لەسەر كورد هاوكاری عوسمانی و سەفەوی هاوچەرخ سیاسەتی قڕكردن بەهاوبەشی و بەشێوەیەكی پەلەپەلە بەڕێوە دەبەن. هەر كەس دەزانێت كە دۆستایەتی ئەوانە كورت خایەنە"مۆقەت"، رۆژێك حیسابی راستیان لەگەڵ یەكتر دێتە گۆڕێ و ئەوە ئەو كاتەیە كە خەڵكی كورد و كوردستان یەكلاكەرەوە دەبن.
كوردی ئازاد بەهزر و رامانی رێبەر ئاپۆ دەیەوێت شەرافەتمەندانە بژی
مەزڵووم حەفتەن سەبارەت بە كپ كردنی دەنگی گەلان و بەتایبەتی كورد و بەلوچ لەپاش دەستپێكردنی شۆڕشی ژن، ژیان، ئازادیەوە دەڵێت؛ مێژووییەن دەزانین كە كورد و كوردستان خاوەن رۆڵێكی ژئۆستراتیژی و ژئۆپۆلیتیكیە. ئەگەر كەسانێك یاخود لایەنێك بەهەر هۆكارێك حیسابی هەڵە و خراپ بكات، ئەگەری هەی كارەساتی قەرەبوو نەكراو بێتە ئاراوە. كوشتنیی حكۆمەتی غۆڵامڕەزا رەسایی، یا كەسانی تر كە ئەمڕۆ لەژێر پەتی سێدارەن، وەك شەریفەی محەمەدی و پەخشان عەزیزی و كەسانی تر دەبێت حیسابی ئەوە بكەن، كە كوردكوژی، عەرەبكوژی، بەلوچ كوژی و ژنكوژی و لەسێدارەدانیان لێ قەبوڵ ناكرێت و تێچووی گران دەبێت. پێویستە حیسابی ئەو شتانە بكەن كە رۆژی ئەمڕۆ حیسابیان لەسەر ئەو بابەتە كردوە و بەخۆیاندا بچنەوە. ئەمڕۆ كە سەیر بكەین، ئەو پرسیارە دروست دەبێت كە ئاخۆ دوای شۆڕشی ژن، ژیان، ئازادی بڕیاریاندا كە بەلوچستان و كوردستان بێدەنگ بكەن، ئەوە بڕیارێكی درێژخایەنی حكومەتە. ئەگەر وەها بێت ئەو رێككەوتنە ئیستخباراتی و ئەمنیەتیانەی لەگەڵ حكومەتی ئاكەپە و ئەردۆغان لەگەڵ هێڵی خیانەت بنەماڵەی بارزانی لەبەرامبەر بەكوردی ئازاد ئەنجامی دەدەن، ئەوەی لەسەر گەلان، بەتایبەتی لەسەر كورد بەڕێوە دەبەن بڕیاری یەكلاكەرەوە و یەكسەرەیە، ئەوا دەتوانێت هاوسەنگی زۆر مەترسیدار و خراپ لەناوچەكە لەگەڵ خۆیدا بهێنێت. بۆیە دەبێت هەر كەس حیسابی ئەوە بكات و نەڵێن كە كورد هەر كوردی بنەماڵەی بارزانییە كە لەكۆتایی سەدە پێكەوەی ناون، لەسەر ئەوەی كە كورد خیانەتكار و بەكرێگیراوە، دروستكراوی دەستی دەرەوەیە، كورد ئامێرە و دەتوانێت سەركوتی خەڵكەكەی خۆی بكات، ئەوا لەهەڵەدان. ئەمڕۆكە كوردی نوێ كە بەگوێرەی هزر و رامانی رێبەر ئاپۆ كاروخەبات بەڕێوە دەبات، جیاوازە و ناسنامەیەكی نوێیە لەرۆژهەڵاتی ناوین دا. ئەو كوردە نابێتە نۆكەری كەس و دەستی كەس ماچ ناكات. بۆ ئەوەی بەشەرافەت بژی قوربانی بۆ دەدات. قوربانیەكەشی چەندە قورس بێت، ئەوا ئامادەیە كە ئەو قوربانیە بدات. كوردی نوێ لەمردن باكی نییە. لەژیانی نۆكەری و بەکرێگیراوی دەترسێت، بۆیە بەهەڵپەڕكێوە دێتە نێو گۆڕەپانەكەوە. ئەو كەسانەی كە ئاڵای ئازادی و دیموكراسیان بەرز كردۆتەوە، بەگوێرەی ئەو فكر و فەلسەفەیە كار دەكەن. بەبۆنەی كوشتنی حكومەتیی غوڵامڕەزا رەسایی پێویستە چی بكەین، دەبێت كارێك بكەین كە لەسێدارەدان نەمێنێت. پرس ئەوە نییە كە ئەوەی سیاسیە لەسێدارە نەدرێت، نا. ناسنامە چی دەبێت با ببێت، ژنە، گەنجە، سیاسی، پیشەییە، ناسنامە چییە جیاواز نییە، دەبێت ئێمە كارێك بكەین كە لەئێران بەگشتی لەسێدارەدان نەمێنێت. وەك پەژاك كەمپینێكمان دەست پێ كردوە كە نا بۆ لەسێدارەدان، بەڵێ بۆ ژیانی ئازاد و دیمۆكراسی، بۆ ژیانی بەكەرامەت و شەرافەتمەندانەیە و بۆ ئەوە كاروخەبات دەكەین.
بەڕێكخستن بوون رژێم ناچار بەچوكدادان بكەن
بانگەوازیم بۆ هەموو كەسی ئازادیخواز ئەوەیە كە جیا لەناسنامەكەیان، هەوڵ بدەین كە لەسێدارەدان نەمێنێت، هەر رۆژ كورد، بەلوچ، بەهایی، ژنان و كەسانی تر بەبیانوی جیاجیا دەستگیر و دەكوژرێن. دەبێت ئێمە كارێك بكەین كە تێچووی كوشتن و لەسێدارەدان بۆ رژێم گرانتر تەواو بێت. كاتێك تێچووی قورس و گران بوو ئەوا ئەو كارە ناكەن، دەبێت بزانین كە ئەگەر رژێم یەكێك لەزیندان لەسێدارە بدات، ئەوا لەدەرەوە كەسێك بۆ پشتیوانی ئەو كەسانە كەم دەبێتەوە، ئەگەر لەدەرەوە كەسێك یاخود هێز هەبێت كە گوشار بخاتە سەر رژێم ئەوا رژێم لەسێدارە نادات چونكە ناچارە حیساب بكات. ئەگەر لەڕۆژگاری ئەمڕۆدا كەسێك لەسێدارە دەدرێت، جیاواز نییە كە كورد، بەلوچ یا هەر كەسی تر بێت، ژن یا هەر كەسی تر؛ چونكە مرۆڤە، دەبێت لەخۆمان پرسیار بكەین، لەسەر مرۆڤ بوونەكەی دەبێت لەخۆمان پرسیار بكەین، بۆ گەلی كورد و هەموو ئەو كەسانەی كە قوربانی ئەو ناعەدالەتیانەن، دەڵێم، رێكخستن بوون مەرجە، هاوفكری و یەكگرتوویی مەرجە، لەسەر بنەما و هەست و بەرپرسیاریەتی نەتەوەیی، نیشتیمانی، ئەخلاقی، مرۆڤیی، كۆمەڵایەتی و رێكخستن بوونی نەتەوەیی و كۆمەڵایەتی، رژێم ناچار دەبێت لەبەرامبەر بە داواكارییە رەواكانی كۆمەڵگە چۆك دا بدات و گەلانیش بەئازادی بژین.
