لە کەمپی پەنابەرانی شەهید ڕۆستەم جودی مەخمور، بە ئامادەبوونی جەماوەرێكی بەرچاو، یادی شەهید ڤیان سۆران بەرز ڕاگیرا و مەراسیمی یادكردنەوەكە لە ڕێكخراوی بنەماڵەی شەهیدان، بە خولەكێك ڕێزگرتن لە سەرجەم شەهیدانی بزوتنەوەی ئازادی كوردستان بەڕێوەچوو.

دواتر حەلیم هلالی، ئەندامی ئەنجومەنی عەشتار، باسی تێكۆشانی شەهید ڤیان سۆرانی كرد و وتی: هەرچەندە لە بارەی شەهیدانەوە قسە بكەین، هێشتا ناتوانی بەتەواوەتی گوزارشت لە شەهیدان بكەین و كەممان وتووە، ئێمە لەسەر ڕێگای شەهیدان دەڕۆین، شەهیدان ڕێگامان ڕووناك دەكەنەوە، هەڤاڵ ڤیان سۆران، یەكێك بوو لەو هەڤاڵانە.

وتیشی: هەڤاڵ ڤیان بە مەبەستی شەرمەزاركردنی ئەو گۆشەگیرییە توندەی بەسەر ڕێبەر ئاپۆدا سەپێندراوە، ئاگری لە جەستەی خۆی بەردا و بوو بە شەهید، شەهیدبوونی هەر هەڤاڵێك بۆ ئێمە هەم مایەی دڵتەنگییە و هەم جێگای شانازییە، تا كۆتایی ڕێچكە و ڕێبازی شەهیدان دەگرینەبەر.

دوای وتارەكەی حەلیم هلالی، ئەو فیلمە نمایش كرا، كە لەسەر تێكۆشانی شەهید ڤیان ئامادەكرابوو و دوای فیلمەكەش مەراسیمەكە بە دروشمی “بژی سەرۆك ئاپۆ” و “شەهید نامرن” كۆتایی هات.

ف.ق