لێمان شوێش نوێنەری کۆنگرەی ستار لە باشوری کوردستان، لە یادی ١٧هەمین ساڵیادی کۆنگرەی ستار، لەمیانی چاوپێکەوتنێکیدا بۆ ئاژانسی هەواڵی فورات، باس ڕۆڵ و تێکۆشانی ژنانی کۆنگرەی ستار دەکات.

لێمان شوێش لە بارەی دروستبوونی کۆنگرەی ستارەوە وتی: لە ڕۆژئاوای کوردستان خەباتی ژنان مێژوویەکی درێژی هەیە، لەسەر دوو بنەمای سەرەکی کە ئازادیی ژن و ئازادیی کوردستانە، کۆنگرەی ستار لەسەر درێژەدان بەو میراتە دروستبووە، بەبەشداری سەدان و هەزاران ژن هاتنە ناو ئەم تێکۆشانە و دەستیان بەکار و خەبات کرد ئەمەش پێویستی بە ڕێکخستنکردن و کۆکردنەوەیان بوو لەژێر چەترێکدا لەسەر ئەم بنەمایە لە ساڵی ۲۰۰٥ یەکێتی ستار واتا کۆنگرەی ستاری ئەمڕۆ یەکەمین کۆنگرەی خۆی بەست لە ڕۆژئاوای کوردستان.

وتیشی: گرێدانی کۆنگرە لە شەرت و مەرجێکی زۆر دژوار و زەحمەت بوو چونکە ڕژێمی سوریا هەم لە دژی تێکۆشانی ژن و هەم لەدژی تێکۆشانی گەلی کوردیش بوو، دواتر لە کار و خەبات و چالاکییەکانمان بەردەوامبووین تا دوستبوونی شەڕی ناوخۆی سوریا، لە نێوان ڕژێم و گرووپە چەکدارەکاندا، ئێمە نەبووینە لایەنی شەڕ و پشیوانی هیچ لایەکمان نەکرد جگە لە گەلی خۆمان.

هەروەها لەبارەی قۆناغی دوستبوونی شۆڕشەوە وتی: وەک هێڵی سێیەم لە مەیداندا دەستمان بەڕێکخستنی ژنان و کۆمەڵگای خۆمان کرد، تا دروستبوونی شۆڕشی گەلانی ڕۆژئاوای کوردستان، ژنان بە جۆش و هەیەجانێکی زۆرەوە بەشدارییان کرد و ڕۆڵی پێشەنگیان بینی لەم شۆڕشەدا، ڕۆڵ و کاریگەری ژنان وایکرد کە پێویست ببینرێت ئەم ڕێکخستنە فراوانتر بکرێت و سیستمێکی تایبەت بۆ ژنان ئاوابکرێت کە وەک چەترێک بێت بۆ ژنان بۆ ئەوەش هەنگاومان نا بەرەو کۆنگرەی ستار، ئەمەش وایکرد کە میکانیزم و کایەکانی ڕێکخستنی ژنان فراوانترببن.

باسی لە بەشێک لە میکانیزم و هەوڵەکانیان کرد و وتی: بۆنمونە لەڕووی ئابورییەوە ژنان پەروەردەکراون بۆ ئەوەی ببن بە خاوەنی ئابوری سەربەخۆی خۆیان و لەم بوارەشدا ژنان هەنگاوی گەورەیان ناوە، هەروەها لەڕووی ڕاگەیاندنەوە ژنان پەروەردەکران، بۆ ئەوەی ڕاگەیاندنی سەربەخۆی ژنان پێشبکەوێت بۆ گرنگیدان بە پرس و بابەت و ڕووداوەکانی تایبەت بە ژنان و گواستنەوەیان بە هزری ژنان، هەروەها نیشاندانی ڕۆڵی ژنان وەک خۆی لەڕووی فکر وپراکتیکییەوە. ئەوەشی وت: هەروەها دروستکردنی ماڵی ژنان تایبەت بە ژن، هەم وەک ماڵێکی پەروەردەیی و فکری بۆ چارەسەرکردنی کێشەکانی ژنان، هەروەها بۆ داڵدەدانیان، بەشێکی سەرەکی خەباتی کۆنگرەی ستار دروستکردنی کۆمیتەی پەیوەندی و خەباتی دیپلۆماسییە، جگە لە کوردستان لە وڵاتانی عەرەبی و ئەوروپاش، ئەمەش لە پێناو پێشخستنی پەیوەندییەکانمان لەگەڵ ژنانی گەلانی دیکە چونکە پێمان وایە ژنان لە جیهاندا خاوەنی یەک پرسی هاوبەشن، هەروەها بۆ ناساندنی شۆڕشی ڕۆژئاوای کوردستان و ڕۆڵی ژنان لە جیهاندا.