بەبۆنەی هاتنی جەژنی ڕەمەزانەوە لە شاری ڕانیە، کۆمیتەی باوەڕیی تەڤگەری ئازادیی کۆمەڵگای کوردستان و بنەماڵەی شەھیدان سەردانی گۆڕستانی شەهید هەڵوێستیان کرد و تاجەگوڵینەیان دانا.

پاش بیرهێنانەوەی شەهیدانی ڕێگای ئازادی کوردستان، ھاوسەرۆکی تەڤگەری ئازادیی ھەرێمی ڕاپەڕین، سەید خالید تیشکی خستەسەر هەڕەشە و شەڕخوازییەکانی دەوڵەتی داگیرکەری تورک و تیرۆرکردنی ئازادیخوازانی کورد لە جیهاندا، گوتی: "دەبێت گەلەکەمان سەیری  ڕابردووی خۆی بکات و ئەزمون لەو یەکێتیی و ڕێکخستنەی گەلەکەمان لە باکووری کوردستان وەربگرێت، کە چۆن ڕووبەڕووی دەوڵەتی فاشیستی تورک وەستاونەتەوە، ئیرادەی گەلی کورد ئەگەر یەکگرتوو بێت و پشت بەخۆی ببەستێت دەتوانێت بەسەر هەموو بەربەستێکدا سەربکەوێت".

بە ناوی بنەماڵەی شەهیدانەوە، درێعی ڕەشید ڕایگەیاند شەهیدان لەپێناو ئازادبوونی نەتەوەیەکی چەوساوە شەهیدبوون و گوتی: "وەکو بنەماڵەی شەهیدان داوا دەکەین، کوردان یەکڕیزبن، ئەگەر سەرۆکەکانیشیان یەک نەبوو نەتەوە با یەکگرتوو و یەک هەڵوێست بێت بەرامبەر بە دوژمن".