سوپای ئیسرائیل هێرشی ئاسمانی کردە سەر تانکەکانی حکومەتی دیمەشق کە بەرەو سوەیدا دەچوون. هێرشەکە پاش شەڕی دژواری نێوان چەکدارە دروزەکان و هۆزە دەوارنشینەکان دێت.

سوپای ئیسرائیل لەسەر میدیای دیجیتاڵ پەیامێکی بڵاوکردەوە و هێرشەکەی بۆ سەر تانکەکان پشتڕاست کردەوە، گوتی: "هەبوونی ئەم تانکانە لە باشووری سوریا، ڕەنگە ببنە هەڕەشە بۆ سەر دەوڵەتی ئیسرائیل. سوپای ئیسرائیل ڕێگە نادات هەڕەشەیەکی سەربازیی لە باشووری سوریا دەربکەوێت و لەسەر ئەو بناغەیە مامەڵە دەکات".

ئەو تانکانەی ئیسرائیل کردیانیە ئامانج، لە نزیک گوندی سامی لە هەرێمی سوەیدا جێگیرکرا بوون.