دوانیوەڕۆی ئەمڕۆ، لە شاری سلێمانی، لەلایەن ڕێکخراوی ئازادبوونەوە، لە چوارچێوەی چالاکیەکانی ساڵۆنی فکریدا،کۆڕێک بۆ ڕێژوان تەها، موزسیان و نووسەر، میر ئەکبەر موزسیان و لێکۆڵەر لە مۆسیقای کوردی، بەناونیشانی 'دەرکەوتەکانی کەلتووری میوزکی کوردی' بەڕێوەچوو.

هەر یەک لە ڕێژوان تەها و میر ئەکبەر موزسیان ئێوارە کۆڕێکیان بە ناونیشانی 'دەرکەوتەکانی کەلتوور و موزیکی کوردی' سازکرد و تێدا ئامادەبوانیان ئاشناکرد بە کەلتوور و مێژووی هونەر و میوزیکی کوردی و میر ئەکبەر پارچەیەک لە میوزیکی کوردی پێشکەش بە ئامادەبووان کرد.

ڕێژوان تەها، یەکێک لە میوزسیانە ئامادەبووەکانە، باسی لە میوزیکی کوردی کرد، گوتی: "نەتەوەی کورد خاوەنی کۆمەڵێک دەرکەوتەی جۆراو جۆرە لە کەلتورەکەیدا، ئەمەش وادەکات لە چەند لایەکەوە گەشەی کردوە ئەمەش بوو بە هۆی دەوڵەمەند بوونی میوزیک و کەلتوور و فەرهەنگی نەتەوەی کورد، هەروەها ماوەی چەند ساڵێکە سەرقاڵی لێکۆڵینەوەین لە میوزیک و کەلتور و فەرهەنگ و ئاینەکانی کوردستان، دەمانەوێت لە چەند کۆڕ و سیمینار و بەرنامەی تایبەتی تەلەفیزیۆنیدا ئەم باسانە بخەینەڕوو".

هەروەها ئەوەشی خستەڕوو، ئامانجمانە، کە شووناسی گەلی کورد، بگەڕێنینەوە و ئەو تەم و ناڕوونیە لابەرین، کە وڵاتانی داگیرکەر دروستیان کردوە، بە مەبەستی شێواندنی کەلتور و میوزیک و فەرهەنگی کوردی، ئەو ناڕوونی و تەمەی کە دروست بووە نەیهێڵین و ڕووە ڕاستەقینەکە پیشانی گەلی کورد بدەین و هەستی شانازیان بۆ بگەڕێنینەوە.

ڕێژوان لەبارەی گرنگی و پاراستنی هونەری فۆلکلۆری کوردی لە ڕۆژئاوای کوردستان و گرنگیدانی گەنجان بەم جۆرە هونەرانە، باس لەوە دەکات "لە ڕۆژئاوای کوردستاندا ئاگاییەک دروست بووە، بە ئاگابوون لە کورد بوون و کەلتور و مێژووی خۆیان، بەو فەرهەنگەی لە ئیمبڕاتۆریەت و شارستانیەتی کوردی هەبووە، کە تیایدا هەموو گەلان بە دەنگ و ڕەنگە جیاوازەکانەوە دەژیان، ئیستاکەش لە ڕۆژئاوای کوردستاندا، هونەر و میوزیک بناغەیەکی گرنگی خۆی هەیە و چەندین گروپی هونەری بوونیان هەیە، خۆشبەختانە چەندین کار و چالاکی ئەنجامدراوە".

میر ئەکبەر، یەکێک لە میوزسیانە ئامادەبووەکان،  ئاماژەی بەوە کرد، "ئەمە لە یەکەمین هەوڵەکانی ئێمەیە بۆ هۆشیارکردنەوەی خەڵکی لە بارەی مێژو و میوزیکی کوردی، ئامانجمان لە ساز دانی ئەم کۆڕەش، بۆ خستنەڕووی ئەو بەشە میوزیکەی کوردییە، کە نە گێڕدراوەتەوە و وەک پێویست کاری لەسەر نەکراوە، ماوەیەکی زۆرە سەرقاڵی کۆکردنەوەی ئەو میوزیک و مەقاماتە کۆنانەین، هەر بۆیە ئەمڕۆ باس لە میوزیکی یارسان و ئامێری تەمبور کرا، تەواوی ئەو ئاوازانەی، کە لەناو میوزیکی یارساندا بوونیان هەیە، کە لە مێژوودا بەکار هێنراوە و ئەو پۆلێنانە چێن کە میوزیکی یارسان پۆلێن دەکات، لە داهاتووشدا ئێمە بەردەوام دەبین لە هەوڵەکانمان بۆ زیاتر خزمەت کردنی هونەری کوردی و هۆشیارکردنەوەی خەڵکی".