٤ کچە خوێندکاری بەلوچ لە ئاگرکەوتنەوەى خوێندنگەکەیاندا سوتان
لە یەکێک لە پۆلەکانى خوێندنگەی کچانی ئوسوەى حەسەنە لە شاری زاهیدان لە ئێران ٤ خوێندکاری کچ سوتان.
لە یەکێک لە پۆلەکانى خوێندنگەی کچانی ئوسوەى حەسەنە لە شاری زاهیدان لە ئێران ٤ خوێندکاری کچ سوتان.
بەپێى میدیاکانى بەلوچستان سۆپای خوێندنگەى کچانی ئوسوەى حەسەنە لە شەقامی مستەفا خومەینى ٢٣ی زاهیدان ئاگری گرتووە و بەو هۆیەوە ٤ کچە خوێندکار سوتان. ٣ لە کچە خوێندکارەکان گیانیان لە دەستداوە و باری تەندروستیى یەکێکى تریشیان ناجێگیرە.
هەر یەک لە سەبا عەرەبی، مونا خوسرەوپەرست و مریەم نۆکەندی لەو ئاگرکەوتنەوەیەدا گیانیان لە دەستداوە و یەکتا میرشکاریش بەهۆی زۆریى سوتاوییەوە باری تەندروستیى ناجێگیرە.
بەرێوەبەرى ئاگرکوژێنەوەى زاهیدان هۆکاری ئاگرکەوتنەوەکەى بۆ نەبوونی پێداویستى گونجاوى گەرمکەرەوە و بەکارهێنانى سۆپا لە پۆلەکانى خوێندندا گەڕاندووەتەوە.
دوابەدواى ئەو ئاگرکەوتنەوەیە مەلەک محەمەد سنجرانى بەڕێوەبەریى پەروەردەى ناوچەى ٢ی زاهیدان دەستى لەکارکێشاوەتەوە.
هاوکات داواکارى گشتی و شۆڕشی زاهیدان بڕیارى دەستگیرکردنى بۆ بەڕێوەبەر و بەرپرسانى ئەو خوێندنگەیە دەرکردووە.
پێشتریش لە ١٥ی سەرماوەزی ١٣٩١ / ٥ی کانوونی یەکەمی ٢٠١٢ لە خوێندنگەى گوندی شیناوێ لە پیرانشار بەهۆی بەکارهێنانى سوپاوە ئاگرێک کەوتەوە و بەو هۆیەوە سەیران یەگانە، سارینا رەسوڵ زادە گیانیان لە دەستدا و ١٢ خوێندکارى تری کچیش بە قورسی سوتان.
بەپێی ئامارەکانى دەوڵەتى ئێران لە ساڵی ١٣٧٦ی کۆچی هەتاوی / ١٩٩٧ تاوەکو ئێستا زیاتر لە ٥٠ خوێندکار بەهۆی کەوتنەوەى ئاگر لە خوێندنگاکانى ئێران دا گیانیان لە دەستداوە.
ر.م