چالاکی خانەوادەی شەهیدان لە دەروازەی سنوری سێمالکا بۆ وەرگرتنی تەرمی گەریلا شەهیدەکان ٨٥ رۆژە بەردەوامە.

دەزگا و ناوەندەکانی سەر بە تەڤ دەم و ئەنجومەنی خانەوادەی شەهیدانی ناوچەی تەل کۆچەری کانتۆنی قامشلۆ ئەمڕۆ چالاکیەکەی دەور وەرگرت.

محەمەد عەبدولعەزیز  ئەندامی تەڤ دەم لە هەرێمی دێرک قسەی کرد و کردەوەکانی پەدەکە و داخستنی دەروازە سنوریەکانی شەرمەزار کرد.

محەمەد عەبدولعەزیز بانگەوازی چەکدارانی پەدەکە و چەتەکانی رۆژی کرد و وتی، " ئێوە بە خۆڕادەستکردنی فاشیزمی تورک، ناتوانن خزمەتی گەلی کورد بکەن. ئەو کردەوەیە سیخوڕی و چەتەتیە. هەڵکەندنی خەندەق لە دەوری رۆژئاوا و داخستنی دەروازەکان خزمەتی پیلانەکانی دەوڵەتی فاشیستی تورک دەکات."

هەروەها بەم شێوەیە قسەی کرد، " ئەو گەریلایانەی کە کوردستان دەپارێزن و کاتی هێرشی چەتەکانی داعش فریای شەنگال و هەولێر کەوتن، بە شێوەیەکی دڕندانە شەهیدکران." هەروەها بانگەوازی لە پەدەکە کرد و رایگەیاند، ئەگەر گەریلا نەبوونایە ئێوە پارویەکی ئاسان دەبوون بۆ داگیرکەری تورک."

محەمەد عەبدولعەزیز باسی ئەوەی کرد کە تاوەکو تەرمی شەهیدان رادەست نەکرێتەوە، چالاکیەکەیان بەردەوام دەبێت.

ف.ق