ناوەندی ڕاگەیاندنی هێزەکانی سوریای دیموکراتیک (قەسەدە) لە ڕاگەیەندراوێکدا کە لە ماڵپەری فەرمی خۆی بڵاویکردووەتەوە، ئاماژەی بەوەکردووە، چەتەیەکی داعشیان دەستگیرکردووە، کە "ئامادەکاری بۆ هێرشێکی 'تیرۆریستی' دەکرد".

لە ڕاگەیەندراوەکەدا ھاتووە:

"دوێنێ گروپی ئۆپەراسیۆنە سەربازییەکانی سەر بە هێزەکانمان لە ئۆپەراسیۆنێکی ئەمنیدا لە شارۆچکەی تل حەمیس، ئەندامێکی تیرۆریستی ڕێکخراوەکەیان دەستگیرکرد، یەکینەکانمان شوێنی مانەوەی تیرۆریستەکەیان گەمارۆ دا و دەستگیریان کرد. بەگوێرەی زانیارییەکانی هێزەکانمان، ئەو تیرۆریستە ئامادەکاری بۆ ئەنجامدانی ھێرشێکی تیرۆریستی دەکرد. هێزەکانمان لەگەڵ دەستگیرکردنی ئەو کەسەدا، دەستیان بەسەر ژمارەیەک چەک و تەقەمەنیشدا گرت.

ئەو تیرۆریستە لە شارۆچکەی تل حەمیس و گوندەکانی دەورووبەری لە جموجۆڵدا بووە، لە زۆرێک لەو هێرشە تیرۆریستیانەی بۆسەر هێزمان، دامەزراوە مەدەنی و خزمەتگوزارییەکان ئەنجامدراون، بەشدار بووە.

ھێزەکانمان لە پێناو پاراستنی ئاسایش و سەقامگیری ناوچەکە و سەلامەتی گەلەکەمان، دەچنە سەر ئەندامانی ڕێکخراوە تیرۆریستییەکان و لە سەرچاوەوە وشکیان دەکەن".