لە گۆڕەپانی سوریان لە گەڕەکی نەسیرە لە حەسەکە، دوێنێ چالاکیی خێوەت دانان بە ئامانجی شەرمەزارکردنی گۆشەگیری سەر ڕێبەری گەلی کورد عەبدوڵا ئۆجالان و بەدیهێنانی ئازادی جەستەیی وی بەڕێوەچوو. چالاکییەکە لە دووەم ڕۆژدا بەردەوامە.

سەرلەبەیانی ئەمڕۆ، سەدان کەس لە دانیشتووانی حەسەکە، ئەندامانی دامەزراوەکانی ناوچەی باکور و شارەوانی باکور، کۆمۆنەکان، ئەندامانی پارتی یەکێتیی دیموکراتیک (پەیەدە) لە ناوچەی ڕۆژهەڵات چوونەتە خێوەتی چالاکییەکە و دروشمی "بێ سەرۆک ژیان نابێ"یان بەرزکردەوە.

لە چالاکییەکانی ڕۆژی دووەم و کۆتا ڕۆژدا، ئەندامی کۆمیتەی ژنانی (پەیەدە) لە ناوچەی ڕۆژهەڵات سەباح قەرە، گوتی: "لێرەوە دەنگمان دەگەینینە هەموو جیهان و دەڵێین ڕێبەر عەبدوڵا ئۆجالان لە زیندانە، بەڵام فیکری وی لە ڕۆژئاوا بڵاوبووەتەوە".  

سەباح گوتی: "دەبێت ئێمە شایستەی ئەو مافانە بین کە ڕێبەر عەبدوڵا ئۆجالان بەخشیویەتی بە ژنان. دەبێت لەپێناو ئەو مافانە تێبکۆشین".

لەلایەکی دیکەوە، شاعیر، مەلکەت ئەحمەد، گوتی: " بەناوی مرۆڤایەتی و ویژدانەوە داوا لە ڕێکخراوە نێونەتەوەیی و یاساییەکان و جڤاکی نێونەتەوەیی دەکەین، ڕەوشی تەندروستی ڕێبەر عەبدوڵا ئۆجالان ئاشکرا بکەن".

ئەحمەد بە شیعرێک کۆتایی بە وتارەکەی هێنا.

چالاکییەکە کاتژمێر ٥ ی ئێوارە بە ڕاگەیاندنێک کۆتایی دێت.