شەڕڤانانی یەکینەکانی پاراستنی ژن (یەپەژە) لە ٨ی کانوونی یەکەمی ٢٠٢٤وە لە بەرەکانی بەنداوی تشرین بە متمانەی سەرکەوتنەوە بەرخۆدانێکی مێژووی بەڕێوەدەبەن.

شەڕڤانان لە تونێلەکانی بەرخۆدان هەم بە بڕیار و هەم بە خواستی تێکۆشان لە دژی هەوڵە داگیرکارییەکان هەڵوێستێکی بێ هاوتا نیشان دەدەن.

بڕیاری سەرکەوتنمان داوە

شەڕڤانی یەپەژە سارا تۆهەڵدان ئاماژەی بە تێکۆشان لە دژی هێرشە زەمینیەکان و ئاسمانییەکانی دەوڵەتی تورک و چەتەکانی سوپای نیشتیمانی سووریا (SNA) کرد و گوتی: "بۆ پاراستنی بەنداوی تشرین لەوێداین. رێگە بە داگیرکاری تورک نادەین و لە دژی هێرشەکان بەرخۆدانێکی بێ هاوتا نیشان دەدەین. دووژمن هەرچەند هەوڵبدات بەرەو پێشەوە بچێت بەڵام لە پێش بڕیاری شەڕڤانانی قەسەدە و یەپەژە ناتوانێت هەنگاوێک بنێت. بێگومان ڕێگە بە داگیرکاری نادەین، چونکە بڕیاری سەرکەوتنمان داوە".

سارا تۆهەڵدان سڵاوی لە پشتگیری بەرخۆدانی گەل کرد و گوتی: "لەبەر هێرشەکان گەلەکەمان شەهید و بریندار دەبن، بەڵام گەلەکەمان بە بڕیاری ئێشکگری لە بەنداوی تشرین بەردەوامە. گەلەکەمان بە ڕۆحی فیداکارییەوە لەگەڵمانە. لە پشتگیرییەکانی ئەوانەوە هێز وەردەگرین، بەو هێزەوە ئەرک و بەرپرسیارێتی خۆمان تاوەکو کۆتایی جێبەجێ دەکەین".

'لە تونێلەکانی بەرخۆدان مێژوو دەنوسرێتەوە'

شەڕڤانی عەرەبی یەپەژە ڤیان تۆهەڵدان ئاماژەی بە یەکێتی گەل و شەڕڤانان کرد و گوتی: "تاوەکو داگیرکاری تورک کۆتایی نەیەت هەرگیز دەست لەم تێکۆشانە هەڵناگرین. دووژمن لە پێش بەرخۆدانمان ناتوانێت بەرەو پێشەوە بچێت و دەکشێتەوە. ئەو بەرخۆدانەی کە ئەمڕۆ لە بەنداوی تشرین بەڕێوەدەچێت لە سایەیی هیوا و متمانەی گەلەوەیە".

ڤیان تۆهەڵدان ئاماژەی بەوەدا متمانە و پشتگیری گەل بۆ بەرخۆدان سەرچاوەی ماتەوزەی شەڕڤانانە و گوتی: "بە متمانەی گەلەوە درێژە بەرخۆدانمان دەدەین و هەموو جۆرە هێرشێکی داگیرکەر دەشکێنین. لەگەڵ گەلەکەماندا ئەم تێکۆشانە سەردەخەین".