شاخی گڕکانی مەراپی کە دەکەوێتە دوورگەی سوماترا، ڕۆژی یەکشەممە کاتژمێر ١٤:٥٤ تەقیەوە.

عەبدولمەلیک، سەرۆکی دەزگای گەڕان و فریاگوزاری وتی: "تا ئێستا ٢٦ کەس کە نەگوازراونەتەوە بۆ نەخۆشخانە، ١٤ کەسمان دۆزیوەتەوە، ٣ کەسیان زیندوو بوون و ١١ کەسیان مردبوون".

مالیک دەستنیشانی کرد کە سێ کەس کە لە گرکانەکەوە نزیک بوون بە زیندوویی ڕزگار کراون و وتی: "ئەوان لاواز بوون و جەستەی هەندێکیان سووتا بوو".

عەبدولمەلیک دەستنیشانی کرد کە تا ئێستا ١٢ گەشتیار بێسەروشوێنن و ڕایگەیاند، کە ٤٩ کەس لە شاخەکە دابەزیون، هەندێکیان گواستراونەتەوە بۆ نەخۆشخانە.

سەرۆکی سەنتەری مەترسییە جیۆلۆجیەکان و گڕکانزانی ئەندەنوسیا، هێندرا گوناوان، ڕۆژی یەکشەممە لێدوانێکی دا و دەستنیشانی کرد کە،  کاتی تەقینی گڕکانەکەی چیای مەراپی خۆلی نزیک دەمی گرکانەکە ٣٠٠٠ مەتر بەرز بۆتەوە.

ئەندەنوسیا دەکەوێتە سەر بازنەی ئاگرینی زەریای هێمن و نزیکەی ١٣٠ گڕکانی چالاک لەم وڵاتەدا بوونی هەیە.