ماوەی ١٢ ساڵە لە شاری ستراسبورگی فەرەنسا چالاکیەک بۆ ئازادیی ڕێبەری گەلی کورد عەبدوڵا ئۆجالان بەڕێوەدەچێت، چالاکیەکە لە هەفتەی ٦٣٤ـەمینی دایە، گروپێک لە هەرێمی شتوتگارتی ئەڵمانیا ئەم هەفتەیە چالاکیەکەیان وەرگرت.
بە پێشەنگایەتی دەستپێشخەری ئازادی بۆ عەبدوڵا ئۆجالان لە ٢٥ ی حوزەیرانی ٢٠١٢ ـەوە چالاکی "ئیشکگریی ئازادی" بە ئامانجی لابردنی گۆشەگیریی سەر ڕێبەری گەلی کورد عەبدوڵا ئۆجالان و مسۆگەرکردنی ئازادی جەستەیی بەڕێزیان بەڕێوەدەچێت.
هەر هەفتەیەک گروپێک له وڵاتانی جیاوازی ئەوروپاوە دێن و چالاکی ئیشکگرییەکە لە ئەستۆ دەگرن، لە هەفتەی ٦٣٤ـەمیندا، ماکسوت دۆغان، ئایشە موتلو، محەمەد ئەلک، ڕەمەزان ئاسڵان و دەنیز تۆماس لە شتوتگارتی ئەڵمانیا، دەستیان بە چالاکییەکە کرد.
ماکسوت دۆغان بەناوی گروپەکەوە قسەی کرد و وتی: "داوا لە پەرلەمانی ئەوروپا و CPT دەکەین گۆشەگیریی سەر ڕێبەرایەتیمان هەڵبگرن و ئاماژەی بەوەشدا کە هیچ زانیارییەک لە سەر عەبدوڵا ئۆجالان بەدەست نەگەێشتووە و ڕێگری دەکرێت، داوا لە گەلەکەمان دەکەین لە دەوری ڕێبەرایەتیمان کۆببنەوە و درێژە بە چالاکییەکانیان بدەن."
هەروەها عایشە موتلو، ئەندامی دیکەی گروپەکە، ئاماژەی بەوەکرد کە ئەم بەرخۆدانە بەردەوامە هەتا لابردنی گۆشەگیریی و داوای لە گەلەکەمان کرد بۆ هەڵگرتنی گۆشەگیری لە چوارچێوەی هەڵمەتی ئازادییدا بڕژێنە گۆڕەپانەکان."
