ناوەندوو ئەرەیاونای یەکینەکاو پارێزنای گەلی (یەپەگە)ی سەبارەت پا بابەتەیە سەروو ماڵپەڕی ڕسمیی وێشۊ ئەرەیاوناێوەش وەڵا کەرڎۊ. 

جە ئەرەیاوناکەینە ئامان، "هجوومەکاو دەوڵەتوو تورکی ئەرەگیری و کۊلۊنیالیستی پەی سەروو بۊ سەر سەرنیشت و وەرکەوتوو سوریای گرڎ ڕوۍ بەرڎەوامێنۍ. دەگا و شارەکاما بەهەڕەمەکی تۊپواران کەرا و هەوڵۍ مدا دەدەن ئارامیی مەنتێقەکەی بشێونا. وەروو ئانەی هێزە میاننەتەوەییەکۍ وەراوەروو ئا هجوومانە بێدەنگێنۍ، دەوڵەتوو تورکی ئەرەگیری ئا بێدەنگییە بە فرسەت زانۊ هجوومەکێش زیادۍ کەرڎێنۍ. جە ساڵیادوو کۊکوشیی شەنگالدینە جە ٣ ئابینە جە دەگاو هرمێشێخۊو سەر بە کانتۊنوو قامیشلۊی، سەیارێوە کریا ئامانج. سەیارەکەنە ٤ فەرماندۍ و ٢ جەنگەوانێما، کە مەرەخەسینە بێنۍ کریۍ ئامانجوو ئا هجوومە ناجوامێرانەیە. هامڕا و فەرماندەکێما دیار، گارزان، هیوا و ئۊرهان گەشمەرڎۍ بیێ".

ئاماژەش پانەیچە کەرڎەن: "دەوڵەتوو تورکی ئەرەگیری پا هجووما خەیاڵشا واچۊ هەقەو مەڕیای داعشی شەنگال و وەرنیشتنە کەرۊوە. حەر چوار هامڕێکێما چندین ساڵێن دژوو هجوومە ئەرەگیرییەکا بەتایبەتی هجووموو چەتەکاو سوپای ئازادۍ، ئەلنوسرە و داعشی بە ئازایەتیی فرەوە جەنگشا کەرد. بەشداربییەی ئا هامڕایاما بەتایبەتی جەنگەکاو بەینوو ساڵەکاو ٢٠١٤-٢٠١٩ جە دژوو داعشینە بێهامتا بۍ. ئا گیانبازی و ڕەنجەشا هەرگیز یاد مەشۊ و بەرڎەوام کۊشیایمانە ویر مێوە. سەروو ئا بنەمێوە سەرەوەشی جە گەلی وەڵاتپارێزنوو سەرنیشت و وەرکەوتوو سوریای بەتایبەتی و بنەیانەو  ئا گەشمەرڎاما کەرمۍ. جارێوە تەر وەعد ئەوەخوای کەرمێوە، کە شۊنکەوتۍ وەرم و ئاواتەکاشا بیمۍ و هەقەشا کەرمێوە و ئایندێوە ئازاد کەرمۍ سەوقاتوو گەلاو هەرێمەکەی".

شناسنامەو گەشمەرڎا:

شناسنامێ: دیار شۊڕش

نامۍ و دمانامێ: دیار خەلیل

نامۍ ئەڎێ: ناریمان

نامۍ تاتەی: جومعە

یاگۍ و وەختوو گەشمەرڎەبییەی: قامیشلۊ/ ٣ ئابوو ٢٠٢٣

شناسنامێ: گارزان قامیشلۊ

نامۍ و دمانامێ: بارزان شێخموس

نامۍ ئەڎێ: لەیلا

نامۍ تاتەی: مستەفا

یاگۍ و وەختوو گەشمەرڎەبییەی: قامیشلۊ/ ٣ ئابوو ٢٠٢٣

شناسنامێ: هیوا قامیشلۊ

نامۍ و دمانامێ: ئەحمەد سمۊ

نامۍ ئەڎێ: گوڵێ

نامۍ تاتەی: فازڵ

یاگۍ و وەختوو گەشمەرڎەبییەی: قامیشلۊ/ ٣ ئابوو ٢٠٢٣

شناسنامێ: ئۊرهان قامیشلۊ

نامۍ و دمانامێ: ئارام ئیبراهیم

نامۍ ئەڎێ: شێخە

نامۍ تاتەی: محەمەد

یاگۍ و وەختوو گەشمەرڎەبییەی: قامیشلۊ/ ٣ ئابوو ٢٠٢٣

س.ز